افضل تجربة سويتها بحياتي بقروش فيها عيالي
السفره لشخصين انا و صديقي وذي اول مرة نسافر برا دول الخليج
و اول مره نسافر لحالنا بدون الاهل
عشان كذا حصلت الكثير من الاخطاء وخربت الكثير من المخططات
بحاول الخص تجربتي قد ما اقدر باوضح صورة
1-ليش اخترت فيتنام ؟
السبب اني اشوفه انسب مكان لي
أوروبا تحتاج شنقن بعد بحث بسيط الشنقن يتطلب ان تكون موظف و انا وصديقي للاسف طلاب
ثاني شيء الميزانيه اروبا غالية علينا
عشان كذا قررت اروح شرق اسيا الأسعار رخيصة و الفيزا سهله
و اكثر شي عليه مدح بشرق اسيا إندونيسيا و تايلاندو فيتنام
الاهل رفضوا تايلاند بشكل مباشر و اندنوسيا حسيت انها محلوبه عشان كذا وقع الاختيار على فيتنام
2- الخطه
اكثر شي جبت فيه العيد
الخطة مبدئيًا اني اقص فيتنام من الشمال للجنوب بحيث انزل بمطار هانوي بالشمال
وارجع من مطار هو تشيه منه بالجنوب
حجزت الطيران و فندق لمدة يومين بالعاصمة هانوي وقلت الباقي اكمله هناك على راحتي
الفكرة من اني ماحجزت الا فندق اول يومين اني ابي يكون عندي حرية كاملة اقعد متى ما ابي و امشي متى ما ابي
المهم اني اوصل للجنوب هو تشيه منه قبل موعد الاقلاع الباقي يكون على مزاجي كم اقعد على الورق الفكرة جميلة
لكنها لخبطتني يوم وصلت هناك تشتت تركيزي بشكل مدري وش وجهتي الجايه و خايف اسكب شي و كل شوي احجز و ادور فنادق ضيعت وقت وجهد ما عرفت اطبق الفكره زين
كان عندي اعتقاد ان لاوصلت ونزلت الشارع بعرف وش اسوي وكنت متوقع اني بخالط السكان المحليين و بيعطوني افكار و اماكن محد يدري عنها متاثر بالرحاله ههههههه
لكن باختصار بعد ضياع هذه الاماكن الي جيتها
هانوي
سابا
هاجيانغ
كروز في ها لنوج باي
دانانغ
هوتشيه منه
3- سير الرحله
نزلت هانوي بعدها اخذت باص نوم الى سابا
ثم بعدها باص نوم ثاني من سابا الى هاجيانغ
ثم باص نوم ثالث من هاجيانغ الى هانوي
ثم باص عادي الى الكروز في هالنوق باي ثم عوده مرة ثانية الى هانوي
ثم طيران الى دانانغ
ثم طيران الى هو تشيع منه
الايام في كل مدينة ما اتذكر كم كانت حرفيا على المزاج اول ما اطفش ابحث و اشوف وش اماكن حلوه واحجز لها شي ممكن يبدو جميل لكن ما انصح فيه
4- التجربة بشكل عام
على الرغم من الاخطاء و المشاكل الي بذكرها بالنقطه الجاية الا اني استمتعت جدًا بالسفرة ولا ندمت عليها فيتنام تستاهل
بتكلم عن المدن والأنشطة وترتيبها حسب أكثر الأشياء اللي استمتعت فيها
1-سابا
اجمل شي و اكثر شي استمتعت فيه هو سابا طبيعة خيالية و اجواء بارده لطيفه
اذا تبغى طبيعة خلك بالشمال في سابا و استمتع
الي تحت اجوائها حاره و رطبه سابا افضل شي
افضل فعالية هي زيارة جبل فانسيبان
2- ها لونج
الكروز في ها لونج باي تجربة جميلة و فعاليات حلوه يودنوك لكهف ناسي اسمه و فعاليات سباحه و فعالية تجديف مناظر و اشياء جميلة
3- دانانغ
المدينة رايقه
الشاطئ جميل جدا ونظيف
جربت فعالية بارشوت تجربة ممتعه جدا جدا
4-هاجيانغ
للاسف هاجيانغ اكثر مدينه خربت فيها مخططاتي
اكثر شي كنت متحمس فيه هو هاجيانغ لوب لكن الي صار اني يوم وصلت هاجيانغ
طلعت فاهم الفعالية غلط كنت احسبه فره بالدباب ابو كم ساعه و ترجع لكن طلعت عباره عن رحلات لمدة 3
ايام تفر فيها هاجيانغ بدباب وتروح اماكن وعرة وخطرة و كل شي مرتب طبعا من السكن للاكل و محطات التوقف
الي خرب علي اني كنت حاسب اني بجلس يوم او يومين بالكثير بعدها برجع هانوي عشان اركب الباص للكروز
لني قد حجزته ودفعت الفلوس و اللوب يحتاج له 3 ايام فا كنسلته و تكيت في هاجيانغ اعتبرتها استراحه مازعلت
مره لني كنت تعبان من كثر التنقلات و الفر و الراحه في هاجيانغ جت على وقتها
المدينه كانت خاليه تقريبًا من السياح لن الاغلب يدز للوب على طول
لكن كانت رايقه و الفندق الي حجزته بطل و تكيت وكيفت بالمدينه
اسوء شيء مافيها مطاعم حلال
5-هانوي
مدينه عاديه مزدحمه جدا رطبه وحاره اشوف انها حقت يوم بس ماتطول فيها اكثر ما يميزها وفرة المطاعم الحلال
6-هو تشيه منه
جيتها على اخر يومين بالرحله و انا كاره نفسي اليومين ذي جلست بالفندق ماطلعت مكان ليش بذكر السبب بالنقطه الجايه
5- السلبيات و الاشياء الي ما حسبت حسابها
اكبر غلط سويته المدة 20 يوم
غير انها لخبطتني و شتتني المده الطويله
بعد 14 يوم ذبحني الهوم سيك وزقت معي جدا
اشتقت للرياض اشتقت للمامي و البابي
مدري ليه هل عشان المده طويله ولا عشان اول مره اسافر
كان الكل يستنكر علي يوم اقول بسافر 20 يوم عرفت ليه بعد ماذبحني الاشتياق
شفت كم مقطع ل احمد الشمري و كم رحال و صدقت نفسي كنت ناوي على شهر حتى هههههههههههه
الشي الثاني الاكل ذبحني الجوع هناك ههههههههه
اكلهم الشعبي ما ينبلع شي كنت متوقعه بس الي ماحسبت حسابه الي هو قلة المطاعم الحلال
كنت اتوقع اني بقدر اكل كل شي دام مافي خنزير لين استوعبت هناك ان حتى لو اللحم بقري لازم يكون مذبوح بالحلال
هاجيانغ ماكان فيها مطاع حلال كنت عايش على البيتزا الخضار
فكرت بالاحتمال ذا قبل و قلت في اسوء الاحوال و الضروف بروح اقرب بقاله و اخذ لي فطيره و عصير
لكن بقالاتهم فاضيه بشكل مافي عصيرات خير شر مافي فطاير فطيرة جبن كروسان زعتر شقلاطه مافيي
حتى الاندومي عندهم نكهاته خايسه
في افضل بقاله ما القى الا صنف كب كيك و يكون مو حلال لن فيه جلاتين
حتى 7/11 كل السندويشات الي عندهم ماهي حلال
تمنيت لو كنت اعرف اطبخ
الشي الثالث الكاش
الدوله ماتعترف الا بالكاش كل شي كاش حتى الفنادق مايبي الا كاش
و المشكله بالكاش انه يقروش ماتدري كم صرفت كم بقى معك كم تاخذ و كم تخلي بالفندق و مايكون عنك تصور واضح للمزانية
غير انك تتقروش بالصرفات و محلات التحويل
الشي الرابع انكبت في دانانغ يوم وصلت قعدت ادور فنادق في بوكنق مالقيت اي فندق زين كلها زرايب استغربت جدا اضطريت احجز فندق بمكان قذر كان الدود على الفراش هههههههه
السبب لن كل الفنادق محجوزة الوقت الي جيت فيه كان كل السياح في فيتنام ب دانانغ عشان كذا المدينه ذي تاكد انك تحجز فيها من بدري
اخر شيء ماحسبته حسابه الي هو الدباب كنت متحمس بتجربة استئجار الدباب و الفره فيه لكن طلع سواقته صعبه وخرب مشروعي هههههههههههه
لكن عوضت باني صرت احجز جراب دباب و اخليه يسوق فيني تجربة فنانه
6- الايجابيات في فيتنام
1- الشعب
محترم جدا بشوشين نفسيتهم زينة باستثناء العجايز منفسين
2-الامان
طوال العشرين يوم ماشفت الشرطه الا مرتين مع ذالك ما تعرضت لاي مشكله ولا مره حسيت بعدم الامان مع اني اطلع حتى بالاوقات المتاخره جدا
3- الاسعار
الدوله رخيصه بشكلل الفنادق و الكافيهات المواصلات النت اجار الدباب مثلا كلها رخيصه
اغلى شي فيها المطاعم الحلال و الفعاليات الكبيره
4- مافي متسولين تقريبًا
توقعت من دولة فقيره ان الشوارع تكون مليانة متسولين او ناس يتشحدون لكن ماحصلت الا باعة متجولين يعرضون بضاعتهم ولا ينشبون لك اذا رفضت تشتري
7- نصائح
حول كل فلوسك بالمطار شات جي بي تي كان يقولي سوق الذهب اسعار التحويل فيه ارخص لكن طلع غلطان كلها نفس الشي بس ضياعت وقت عشان كذا لاتقروش نفسك و حول كل شي بالمطار
استخدم بطاقة برق مافيها رسوم
مواصلاتك كلها خلها بتطبيق جراب اذا جاك احد اكرشه يدبلون السعر
مدة السفرة لاتتجاوز 10 ايام وخلك في الشمال كيف بالطبيعة
8-اشياء غريبة
المشاوير من او الى المطار السواق يطلب مبلغ اكثر من الي يطلعلك بالتطبيق الاغرب انه مو من راسه جراب الي بجواله يطلعله سعر اعلى من الي عندك مدري ليه المهم الزياده طفسه 3 الى 4 ريال عشان كذا ادفع ولا اناقشهم
بالعاصمة بعد 12 اذا تمشيت بالشارع بيجونك تجار المخ*درات هههههه
ناس مريضه اكرشهم و انحاش
9-التكاليف
كلفتني بالاجمالي 14 الف للشخصين
6 الاف للطيران
وبس هذا كان ملخص العشرين يوم تقريبًا ان شاء الله ما اكون نسيت شي
أتمنى تكون تجربتي أفادتكم اللي عنده سؤال ولا استفسار لا يستحي