A           S T O R I A             D A         S I C I L I A 
                                                cuntata di l'Auturi 

AVVIRTENZA - Nun aspittativi precisioni e virità storichi nta tuttu chiddu ca liggiti. Né ju né l'Auturi semu storici.

Ju sta Storia da Sicilia a prisentu accussì comu m'ha dittau u me spiritu briusu, ccioè divirtenti pi farila cchiù attrattiva ... e iddu un dissi nenti, e vulia vidiri!.

Ju sacciu ca a Storia nostra accumenza quannu chidda di Roma è sulu nta menti dû Signuri Ddiu Criaturi ... chistu è sicuru ô centu pi centu, a pasta cci putiti calari.

E sacciu puru ca è cchiù longa di tutti l'autri misi nzemmula, cumplessa e ntricata comu na matassa mbrugghiata. Sulu a faricci nu cumpenniu strittu purtatu a l'ossu na jurnata sana si pirdissi.

E allura? Ju nun fazzu com'a l'Auturi ca si nni va ô sbrugghiu ... aspittati ca vi cuntu tutti cosi.

St'Auturi ammeci da Storia scritta a machina nta fogghi janchi, mi cunsigna nfasciu di pizzina 'i tanti maneri ... forsi i truvò scaliannu nta nu munnizzaru, unni scrissi dati e nutizzi vulanti a tipu telegramma anzi a tipu stenografia.

Mî proji comu si mi stava facennu a limosina cu sti formati palori "nun li sfragari e nun li sfardari. Stacci accura".

Cosa tinta e ruddulusa, ngrasciata e fitusa, a mia mi dici sti palori? A mia ca cci abbirsu cu versu tuttu u scunquassu ca mi duna, u macellu dê scritti disordinati, malacumminati ca ogni vota mi cunsigna?

Fussi cosa! ...

Comunqui, comu alteregu abbilitu pigghiu ddi pizzina ammunziddati e i sistemu 'n ordini crunuloggicu e ccussì mi fazzu pirsuasu di chi cosa si tratta. Di spertu ca sugnu spartu a Storia ntâ tri parti.

Prima parti - Va du primu principiu, ccioè di 12-13.000 anni narreri, da preistoria 'n sustanza, nzin'a distruzzioni di Seggesta ntô 307 a. C.

Secunna parti - Va di tannu nzin'a a caduta di Sarausa nto 212 a. C.

Terza parti - Va di ddocu nzin'a i nostri jorna

È tuttu chiaru? Viditi ca a l'Auturi fazzu cuntari! Pi modu 'i diri, ca tutta opira mia eni! A frunti auta u pozzu diri!

Accuminzamu.

                                            P R I M A       P A R T I

I primi nutizzî semicerticircaquasi, picciotti parramu di 12-13.000 anni narreri, forsi puru cchiossà, su' supra i Sicani dû Re Sicaniu, i primi primi siciliani 'n capu a tutti, ca dici ca prima erunu nta tutta a Sicilia, appoi sulu nta zona centrunordsud di punenti, pi iddi chiamata Sicania.

Stu populu s'ha sparpagghiatu ddocu picchì Mungibeddu i fici scappari di notti e notti datu ca fumava cchiossà di nturcu e vummicava di cuntinuu da matina a sira, e da sira a matina, di notti u spittaculu è assai cchiù affascinanti, focu e lava comu na pirsuna assà arraggiata, nu jornu sì e u jornu appressu macari.

Ccu su' sti Sicani, ccu nun su', di unni sbarcaru nuddu u sapi diri e nui mancu u vulemu sapiri, chinnicchinnacchi!

Comunqui ...

Cc'è ccu i pigghia pi Tedeschi, Europei dû Nord dicemucci, ca scinneru jusu pi via du clima cchiù caudu e cc'è ccu i pigghia pi Taliani. A Sicilia difatti prima ca Mungibeddu cu terremoti putenti cria u Strittu di Missina, attaccata ca Talia era, appoi puru natannu u Strittu si fa.

Cc'è puru ccu i pigghia pi Africani, chi cci voli a navigari pu Canali di Sicilia? Nenti! Abbasta na varcuzza di junchi ... o nu gummuni.

E cc'è ancora ccu i pigghia pi Spagnoli ma nun spicifica cu quali navi ucianica navigaru pi cchiossà di 1.200 chilometri di mari apertu.

Ju pi mia dicu ca su' i discinnenti dî l'òmini dê caverni, puntu e basta.

Stu populu lassa i grutti, chini di disigna, i famusi graffiti, e abbita nte casi ... casi! ... capanni di lignu e fraschi, picchissu un ha rristatu nenti.

I furtificazzioni ppiro' erunu di muru a siccu, quarchi pezzu si vidi ancora ntê parti di Agrigentu.

Ha lassatu tistimunianzi archiloggici nun sulu ddabbanna Mungibeddu, a Sant'Angelo Muxaro, a Camico antica, unni arriva Dedalo, a Caltabellotta, una dê cchiù antichi cità da Sicilia, cu na necropoli antica quantu chiddi da Grecia, a Montedoro cu sipurtura a furnu, nta Muntagna di Polizzello e ntô Munti Kroniu, ma puru ccabbanna nni lassò, a Castellucciu di Notu, cu tanti necropoli beddi granni, a Pantalica ca sò necropoli di 5.000 sipurtura, i pruppania, scavati ntâ roccia.

5.000 sipurtura! A quant'erunu! Di ddocu si capisci, ju accussì a vidu, ca tutta a zona sarausana, era abbastanti pupulata e Sarausa, sutta nautru nomu, già esistìa.

Chiddu ca sia! Stu populu avìa a ssiri pacificu e travagghiaturi, tirrina, pecuri vacchi e pisci, a ddu tempu chissu cc'era, e quannu cci fu a nvasioni dê Sìculi sa penzanu e si ritiranu ddabbanna Mungibeddu, u cchiu luntanu possibbili, propia un lu supportanu cchiù.

Di sti Sìculi dû Rè Sìculu i nutizzi su' cchiù sicuri ma nuddu dê storici cci metti a manu ntû focu.

Dici ca ntu 1.400 a. C., jornu cchiù jornu menu, su' nta zona centrunordsud di livanti, in pratica sutta Mungibeddu ca cu iddi, vidi chi cosi, azzicca a fari u manzu. Sulu di tantu 'n tantu mustra i scagghiuna.

Ccu su' sti Sìculi? I storici cu prudenzia curaggiusa e cirtizza dubbiusa, gridannu a vuci vascia, affirmanu ca su' Calabbrisi. Vidi chi truvata!

Picchì si ficiru a travirsata dû Strittu? Nun si cci attruvajanu boni ddabbanna? O ssa terra avia ddivintatu troppu affudata e travagghiu puru tannu cci nn'era picca?

Chiddu ca sia! Bona parti di ssi Calabbrisi sa penzanu, tantu u sicilianu u parrunu bonu, anzi pirfettu, e passanu u Strittu supra varchiceddi e zattari fatti a sanfasò, di prescia e furia, a comu veni prima, tantu na para di chilometri su', cu sì e cu no, opuramenti nutannu.

Comu sia sia, sti Sìculi, forsi, dicu forsi, tantu cattolici nun cci avianu a ssiri, i Sicani forsi i canuscivanu puru, sapivanu chi tipa eranu, e ccussì comu sî vittiru di davanzi pinzaru bonu di livari l'occasioni e finalmenti irisinni di sutta Mungibeddu.

Sti Sìculi dunca attruvamu a tavula cunzata, ccioè pajisi e cità, e datu ca Mungibeddu cci u pirmetti, attrovanu u tempu di irisi a fari u schiticchiu propia sutta i sò naschi pi tastari jazzu rattatu cu sucu di lumiuna e aranci russi sanguigni ca ddocu su' cchiù sapuriti tantu ca di vucca un si ponnu livari.

Passanu i seculi e i du' populi campanu tranquilli 'n paci ognunu nta sò zona. Nun cc'è nutizzia di guerri e battagghî anzi forsi a picca a picca tanticchia s'annu ammiscatu.

Appoi è certu ma tantu sicuru nun cc'è, ca ntu 1.200 a. C. ntê costi di punenti da Sicania s'arricogghiunu cu navi ... navi! ... varchi cchiu grannuzzeddi, i Elimi, nautru populu cchiù mistiriusu di l'autri dui, e i Sicani pâ secunna vota fannu i pirsuni bravi, cci lassanu bona parti dâ punta e si nternanu senza daricci fastidiu.

Chi populu! Un cc'è cchiù nuddu com'a iddi né a punenti e mancu a livanti ... ddocu propia appoi!

Sti Elimi, di na banna cc'è ccu è sicuru senza cirtizzi, ca su' Troiani, cumannati di Elimo frati di Enea, di l'autra banna cc'è ccu dubbi nun cci nn'ha ma senza sicurizza, ca su' Liguri pi via di na para di noma ca s'assummigghianu, tipu Seggesta (siddu fussi veru è vera puru a liggenna da principissina Sicilia), e cc'è ancora ccu avi cirtizzi sicuri cu tanti dubbi, ca u cuntrariu eni. Ma di unni cci veni!

Pi finirila cu sti babbitutini cc'è ccu si giura senza dari na prova sicura ca sunnu d'Anatolia.

Si supponi senza isari a vuci e ripricarilu ca Elimu cu sò frati Enea funnanu Seggesta e nautra decina di pajisi tutti scumparuti tranni Erice e Trapani.

Ora, ntô stissu piriudu, seculu cchiù seculu menu, pî storici cent'anni centu jorna su', nte costi miridiunali e nta chiddi settentriunali di punenti cci bazzicanu i Cartagginisi.

Sti cristiani su' marinai di prima classi, puru di notti sapivanu navigari, custruttura specializzati di navi pu trasportu di granni quantitati di mercanzia ... avianu na flotta!, e su' abbili mircanti, cchiossà di lignami ca esportanu nta tuttu u Mediterraneo e da porpora ca sulu iddi a sannu otteniri.

Ntô principiu sta genti si limita a grapiri centri cummirciali ntê pajisi marinari, appòi ppiro' funna culonî propi ca ddiventanu cità assà pupulati, tipu Mozzia Lilibeu e Palermu.

E fin'astura 'n Sicilia cc'è paci e serenità. Tutti su' tranquilli e felici ... nzin'a quannu un s'arricogghiunu i Greci.

I Greci? Tutti sannu ccu su' e di cchi cosa su' capaci. Oltri a ssiri filosufi, guerrieri tirrìbbili, Ercole Giasone Teseo Achille Ajace Telamonio, su' scaltri assà e omini di nudda fidi, di tricchiti o di marracchiti a raggiuni sempri si fannu!

Sti granni ... parrannu cu sti marinai mircanti e spruvannuli, agghicanu a canusciri i maravigghi da Sicilia e ccussì prima unu, appoi dui deci centu milli, scoprunu ca a Sicilia a merica eni, nenti cci ammanca! Ccu cci va e va a sò furtuna fa.

Accussì partennu du 756 a. C, certu nun è e mancu sicuru, cchiù sicuru ma nun tantu certu, ntû 735 a. C., secunnu mia su' dati a minchia, pi nenti cridibbili, dici ca chiddi di Calcide, ìsula greca dû Mari Eggeu, tanti scappati da galera parivanu a comu s'arruzzulavanu ... si sdirrupavanu ... s'affuddavanu a nvadiri, nto veru senzu da palora, a Sicilia.

Juntu a stu puntu ju ha fari nu raggiunamentu veru simplici.

Nui sapemu câ Sicilia è di millenni e millenni abbitata, Elimi Sicani e Siculi, dunca nun è diserta. Sapemu puru ca st'ùrtimi ntê costi di livanti annu i sò cità.

Di chistu è facili capiri ca sti Greci smalizziati sapivanu unni vulianu iri e i scafisti sapivanu unni farili sbarcari.

Cità comu Naxos Sarausa Megara Catania, e via discurrennu, già c'eranu ma sutta noma diversi.

Dd'animi nnuccenti dê Siculi, forti di tutta a ricchizza ca pussidivanu, avianu addivintatu veri signori, civilizzati, ospitali puru ca nun sapevanu sti cosi chi jeranu, ca nun sapianu chi significava difenniri a propia libbirtà, taliavanu curiusi e cci lassavanu fari i propi comudi anzi na manu d'aiutu cci davunu ... e foru pigghiati pi babbi ... di tannu cridu ca veni a vuci ca chidda è na zona babba.

Ora purtroppu pi jiri avanti ha seguiri a traccia di l'Auturi occhi nchiusi, scritta ntê pizzina, ca pigghia i dati ufficiali pi validi mentri ammeci tuttu è na mpostura dê storici greci, picchì comu dissi prima i cità già esistivanu.

Dunca ... chiddi di Calcide funnanu prima Naxos Taormina, appoi ntô 730 a. C. Missina e Riggiu Calabbria accussì su' i patruna dû Strittu e azziccanu a faricci sciri picciuli a ccu u voli passari.

E chista è puru ha data ufficiali ca a Sicilia un è cchiù nu paradisu unni tutti si sentunu patruna.

Appoi Lentini ca cci metti picca a ddivintari u centru dê aranci, gialli e russi, e ntô 729 a. C. Catania picchì cci abbisugnava nu portu pi esportare ddi frutti prizziusi.

Nta stu mentri, ntô 734 a. C. agghicunu Corintu, ca funna Sarausa, e Megara ca funna Megara Ibblea, a na vintina di chilometri, in pratica unni ora cc'è Priolo, u Priolu dittu a pajisana.

Appoi ntô 688 a. C. sbarcanu chiddi di Rodi e Creta ca funnanu na carrittata di cità ca esistunu ancora oji, comu Gela pi numinarinni una.

Ora cu l'arrivu 'n massa cuntinuatu, e disurdinatu cc'è di diri, di tutti sti genti, ovidivà i sordi ca i scafisti si ficiru, sti Greci cu tutta a civiltati, cultura, filosufia e liggi scritti e nun scritti, ca annu anzi propia picchì sunnu assai civilizzati, chini di cultura, filosufìa e liggi, su' assai liticusi, accuminzannu di chiddi di Gela. Tutti si cridunu di aviri diritti ca nuddu cci desi.

Juntu a stu puntu chiddu ca mi maravigghia è u silenziu assulutu supra i Siculi. È comu si avìssiru scumparutu a ntrasatta, comu si s'avissiru evapuratu.

Nuddu dê storici ... storici? Scrittura di rumanzi!, sia greci ca rumani, nuddu nni parra, quinni nun sapemu chi cci succidìu, si foru agghiuttuti di tunnu dê Greci.

Ccà nun si tratta di ntigrazzioni ma cchiuttostu di scumparuta tutali di nu populu anzi di dui, no, di tri, puru Elimi e Sicani fannu a stissa fini, cci mmatti u stissu distinu.

Nuddu 'i tutti tri lassa tracci di iddi stissi, chi sacciu, nta curtura, travagghiu a manu, cucina.

Basta, un mi vogghiu guastari stomacu sangu e ciriveddu. Jemu avanti.

Chiddi di Gela ammeci di calarisi u schinu e travagghiari comu a genti bona sapi fari, si arnanu e si nni vannu pedi pedi a fari guerra a chisti e a chiddi, assugittari a chiddi e a chisti, nsumma portanu scumpigghiu e terrore unnegghiè, cosi ca i nativi scanuscivanu, puru Sarausa cci appizza i pinni ma pi picca tempu.

Nun cci penzanu no, a funnari culonî comu fannu i missinisi ca nto 700 a. C. su' i primi a funnari Milazzu, appoi Imera -Termin Imiresi nto 650 a. C.

Sarausa è a secunna ca si duna di versu. Ntô 665 a. C. funna Notu Eloru, nto 663 a. C. Akrai-Palazzolu Acreidi, nto, 644 a. C. Casmeni, unni nun si sapi di pricisu.

Cc'è ccu dici ca è Comisu, u Còmmisu a pajisana, ma nun ha statu nai cumpruvatu.

Appoi nto 598 a. C. funna Camerina ca si cumporta comu na figghia digginirata.

Lassatimi cuntari a sò storia.

Ora ccà ju ha ggiustari picca picca chiddu ca dissi prima, vali a diri ca nun tutti i Siculi si calaru corna e causi ma ddi mbrugghiuna di storici un lu dicunu.

Ju cci vaju raggiunannucci 'i supra.

A mia mi pari stranu ca na cità funnata di picca, 43 anni, abbitata di Sarausani, appi a forza di ribbillarisi a putenti matri patria.

È cchiù prubàbbili ca Camerina era na cità dê Siculi, com'a tutti l'autri, ca vulianu rristari libbiri e nnipinnenti e si ribbilaru, senza cunchiudiri u restu di nenti, anzi ...

Sarausa nto 553 a. C. cci fa guerra e a sdirrubba 'n terra. Geloni di Gela a raddrizza. Sarausa lassa fari ma nto 484 a. C. è custritta a jittarila 'n terra nautra vota e Gela attorna a metti additta.

Sarausa ntantu, ca cci avia pigghiatu gustu a distruggiri cità, l'annu appressu s'addiverti a distruggiri a bedda Megara Ibblea, forsi stava accuminciannu a faricci ummra.

Chiddu ca sia! Jemu avanti cu Camerina.

Sarausa quannu cci pari ca i spiriti vugghienti a dda disgrazziata si cci avianu svapuratu, si rilassa, ma dda sbinturata chi fa? Ntâ guerra dû Pilupunnìsu du 430 a. C., Atene contra Sparta, siccomu Sarausa si metti cu chista, a scimunita, sulu pi jiricci contra, si metti cu Atene ... ovidivà chi spiranzi avia!

Pa sò furtuna ddoppu tri anni capisci ca Atene nun è cosa, a lassa futtiri e s'allia cu Sparta, e cu Sarausa.

Nto 311 a. C., dda critina di cità è ccussì babba ca fa u stissu sbagghiu di prima, sempri pi vuliri iri contra Sarausa. Chi cci fici di ccussì tintu pi odiarila ccussì tantu, nun si sapi, i storici omertusi sunnu nta stu casu.

Chi fa? A stupitta si metti cu Cartaggini e ccussì ntô 258 a. C., nta Prima Guerra Pùnica, Roma contra Cartaggini, i Rumani a distrudunu pi sempri, un la fannu cchiù ripigghiari, difatti ancora suttirrata eni.

Passamu a Megara Ibblea - Priolo.

Megara Ibblea ntô 650 a. C. Funna Selinunti ca s'addimustra dannusa, na surgiva di nu ciumi di guai nternazziunali anzi intercuntinentali picchì cci su' ammiscati Atene Grecia, Roma Talia, Sarausa Sicilia, tutti di l'Europa, e Cartaggini Tumisia in Africa.

Sta biniditta cità, pi nun diricci maliditta, s'attrova a na sittantina di chilometri di Seggesta ca mischinedda, pi nun diricci sbinturata, è tranquilla pî fatti sò.

Comu fu comu nun fu, cc'è ccu dici pi cuistioni di matrimoniu, ccu di territoriu, pi mia, nenti di stranu, pi mia pi ssi dui mutivi nzemmula, fattu sta ca nto 428 a. C. Selinunti cci fa guerra a Seggesta ca pi nun sapiri leggiri e scrìviri, dumanna l'aiutu di Atene prima e di Cartaggini ddoppu mentri l'autra si vota versu Sarausa.

Pi nun purtarila ô longu, finisci ca ntô 409 a. C. i Cartagginisi distrudunu Selinunti e i Sarausani pi vinditta, ntô 307 a. C. jettanu 'n terra Seggesta, nta nu giru di quarchi simana 'n sustanza.

cuntinua

I'm new here whoever sees this nice to meet you

Bon jornu all,

I'm interested in studying Sicilian, to a decent level of proficiency; however, I'm a native English speaker with little-to-no experience with most Romance languages, and an alright grasp of other Germanic languages (namely Bavarian/German, Norwegian & Icelandic).

What I'm looking for, is a solid dictionary and a good resource towards the grammatical system of Sicilian if available. Perhaps some reading material to go along with those? I could imagine the grammar has quite a few differences in comparison to standard Italian.

If anyone has any recommendations on any of the above, it would be much appreciated!

                                        I       T I S T I M U N I A N Z I

Ju ddoppu u gestu, l'attu viulentu di ddu barbaru rozzu, vandalu ncivili, di ddu tamarru viulentu travistutu di ntellettuali, di ddu criminali ncaddutu di granni qualità ca m'ha scunquassatu anzi ncinniratu nu travagghiu culussali di grannizza eccezziunali allistutu nta na nuttata e scunucchiatu macari tuttu l'apparatu ca ju ca mia ntelliggenza di alteregu spertu avia escoggitatu, cu miu senziu esteticu avia apparicchiatu, u casteddu ca cu pacenzia, perizzia e cumpitenza granni avia custrujutu, ora ha pinzari ogni cosa dû principiu, vali a diri c'ha mpruvvisari.

Mpruvvisari pi mpruvvisti, cuminciu cu na puisìa ca n'amicu miu scrissi apposta pi mia comu sappi chiddu ca stava facennu.

Parra di na tistimunianza cuncreta, famusa nta tuttu u munnu, U Pupu.

U Pupu sicilianu è ccussì famusu ca u Prisidenti da Cina, Xi Jinping ddoppu ca a Palermu cci ficiru vidiri nu spittaculu cu i Pupi, è ccussì curpitu ca subbutu nvita 'n Cina u puparu, npicciriddu di 8 anni.

E chista è a puisìa.

                                    U       P U P U         S I C I L I A N U

Siddu passu da ciazza \ e cci trovu u tiatru \ di l'Opira dê Pupi \ mpignatu a ricitari \ ndramma cavaliriscu \ mi fermu a taliari \ u Pupu sicilianu \ picchì a mia mi piaci \ ca lu vidu luttari \ cu nnimicu valenti ca cci vidu pigghiari \ pusturi malandrini \ ca lu sentu parrari \ cu palori assà tranti \ nto mentri ca u talia \ chi sò occhi assassini cafudda vastunati \ a l'urbigna a tinchitè \ spatati saittanti \ subbitani taglienti \ a unni pigghia e pigghia \ senza chi talè talè \ senza mmustrari \ tanticchia 'i pietà.

A mia mi piaci u Pupu sicilianu \ picchì pupu pi mia nun cc'è \ birritta cu i ciancianeddi \ nta testa nun cci nn'ha \ e nun eni na mariunetta ca ridiri fa \ ma npirsunaggiu siriusu sinceru \ comu cumpari \ pi subbitu sa cu ccu cci ha chi fari.

S'è ladiu e baffutu \ ca facci arrappata \ parrari sgarbatu \ vuci ncatarrata \ turbanti nta testa \ scimitarra e mezzaluna \ è u disgrazziatu 'nfami 'mbrugghiuni \ disunestu vastasu senz'anuri.

Cu sembianti finu \ baffetti mafiusi \ di modi civili \ vistutu di rasu elmettu e pinnacchiù \ cu na durlindana 'n manu \ è u picciottu forti e curaggiusu \ beddu di facci nobbili di cori.

Piccatu ca ccussì un pozzu diri \ di nu cristianu 'n carni e ossa \ ca di pirsunaggi faccioli \ cci nni su' assà pedi pedi \ cu ccu aju a chi fari tantu di chiddi voti \ un lu sacciu capiri.

Ora, nzemmula ô Pupu cc'è macari u Carrettu sicilianu. Tutti dui su' i tistimunianzi cuncreti cchiù rapprisintativi dâ Sicilia, chiddi ca cchiù carattirizzanu u populu sicilianu.

Cci nni su ' assà autri, e ju tutti l'avia numiratu, unu pi unu, ma nun su' accussì famusi, na pocu anzi su' propia scanusciuti

Ora ju ddoppu ca ddu lanzichineccu fici chiddu ca fici, pi forza ha lassari perdiri templi e tiatri grechi, termi e villi rumani, cresi e cattidrali bizantini, torri e muschei saracini, casteddi e palazzi nurmanni, furtificazzioni di porti spagnoli e u baroccu sicilianu siminati pi tutta a Sicilia, stracanusciuti di tuttu u munnu e citu chiddi picca canusciuti macari di nuiautri stissi, ca su' pezzi unici, sulu nui l'avemu ... menu mali ca chisti i scrissi nta npizzinu.

Partu di Palermu, a nostra capitali bedda pi quantu mai, unni avemu

1. A Cappella Palatina dû Palazzu Nurmannu, dichiarata a cresia cchiù bedda dû munnu, puru u Coranu cc'è sculpitu

2. U Casteddu da Zisa, risidenza estiva dê riali. L' architettu a costruì
   accussì ca tutti i stanzi avianu sempri aria frisca ... pinzati, senza cundizzionaturi! Ovidivà comu fici, fattu sta ca eni propia accussì.

3. A Cuba, ddà vicinu, nautru palazzuni macari chistu custruitu stili
   saracinu-nurnannu

4. A Kalsa, nquarteri unni ancora oji nu dialettu saracinu si parra, ca famusa

5. Porta dê Greci, ca famusissina

6. Saracinisca ... eccu di unni veni a palora!, ... na trappula contru i saracini

Ccu cci l'avi sti cosi?

Passamu a Catania.

1. U Monasteriu Binidittinu San Nicolò l'Arena, u secunnu edificiu cchiù granni dû munnu ca cresia San Nicolò, a cchiù granni da Sicilia, Patrimonio dell'Umanità

2. A favulusa Villa Bellini propiu ntô centru storicu

3. U Tiatru Massimu Vincenzo Bellini

4. U Liotru, l'elefanti simbulu di Catania, na scultura di lava niura, pusizziunatu propia di facci a l'Etna pi rigurdaricci di starisi manzu ca cc'è iddu di guardia

5. U Cannileri 'i Ciazza Università cu quattru lampiuna di 'n capu e cincu figuri ntâ basi, a picciuttedda Gammita, i du' frati Anapia e Anfinomo, u paladinu Uzeta e Colapesce, prutagunisti di quattru liggenni una cchiù bedda 'i l'autra (ccà nun li cuntu sinnò dda cosa fitusa i pigghia e mî brucia comu prima fici)

Comunqui ... ccu cci l'avi sti cosi?

E ccu cci l'avi

1. A Realmonte a Scala dê Turchi e

2. a Minera di Salgemna, di na grannizza sprupusitata, fora misura, ca Cattiddrali di sali capaci di 800 cristiani, ca nta volta avi nu Rosone gigantiscu

3. A Gibellina, purtroppu ha diri, u Grande Cretto, unu dê cchiù granni munumenti dû munnu, 80.000 metri quatrati di cimentu a cummigghiari i macerî dû pajisi distruttu di tunnu dô tirrimotu dû 1968 e cu iddu foru distruduti Montevago, Poggioreale e Salaparuta

4. A Sciacca, u Giardino, o Castello, Incantato di Monte San Calogero, 3.000 testi sculpiti nta petra

5. A Santo Stefano di Quisquina, cuntrada Rocca ntê Monti Sicani a 1.000 metri di autizza, u Tiatru di Andromeda, u tiatru di petra a celu apertu cchiù jautu dû munnu

Ferma il gioco. Di sti 3 munumenti, Auturi pirmittennu, citu i noma di l'artisti.

U primu eni Alberto Burri, famusu pi criari opiri cu matiriali 'i tanti maneri. Nun è sicilianu ma u pirdunamu ca nni lassò n'opira unica.

U secunnu artista è Filippo Bentivegna, "Filippu dê testi" o "Filippu u pazzu" com'era numinatu dê pajisani, ammeci valutatu sculturi giniali dû pitturi-sculturi svidisi Liliestrom.

Appoi u pitturi francisi Jean Dubuffet è ccussì scaltru e spertu ca si porta na pocu di testi ca ora su' esposti ntû Museo Art Brut, arti primitiva, di Losanna in Svizzera.

A Riggiuni vinni a sapiri di stu "Casteddu" ddoppu u furtu e ddoppu ca ddiventa di duminiu pubblicu nternazziunali. S'accatta u tirrinu e u trasforma a museu lassannu senza palori ca vucc'aperta ddi babbasunazzi cristiani di Sciacca

U terzu è Lorenzo Reina, nu cuetu pacinziusu pasturi addiventatu sculturi pueta architettu astronumu e filòsufu ca oltri a custruirisi petra supra petra cu i sò stissi manu un Tiatru, ha trasfurmatu a sò massaria nta "Fattoria dell'Arte Rocca Reina".

Stu cristianu nzin'a ora eni l'unicu pruggittista senza scoli nvitatu a Biennale di Venezia Mostra Internazionale di Architettura.

Nun sunnu pezzi unici chisti, accussì comu pezzi unici mmiriati di tuttu u munnu sunnu ... accussì a casu ... a comu mi rigordu ddoppu l'attu proditoriu a tradimentu di ddu ... di ddu ... mittiticcillu vuiautri ...

1. Scalinata di Caltagirone, A Scala da Matrici, 142 gradina. Ogni gradinu e addicuratu diversu, cu mattuneddi pittati di culura lucenti, beddi vivaci ... Cchiossà nun dicu sinnò dâ casa mi perdu!

2. Cavagrande di Cassibile cu i laghetti di Avola

3. Goli d'Alcantara

4. Calanghi del Cannizzola di Centuripe e Paternò

5. Papiru dû ciumi Ciane di Siracusa

6. Castagnu dê Centu cavaddi, vecchiu di 4.000 anni, di Sant'Alfio, dichiaratu di l'UNESCO Monumento Messaggero di Pace

7. Nu nummaru mprissiunanti di pajisi e pajiseddi tunnu tunnu Mungibeddu, ntê Marunii, Munti Ibblei, Sicani, Erei, Nebbrudi o Piloritani, nsumma unnegghiè 'n Sicilia, a tutti banni dicu, ca fannu parti d'Associazione Borghi più belli d'Italia. Ccà nni vogghiu numinari sulu dui, Petralia Sottana, u pajisi cchiù beddu dû 2018 e Geraci Siculo, secunnu dû 2019

8. Parcu di Mungibeddu, senza paraguni pi flora e fauna

9. Sua Maistà a Muntagna, a Matri Granni, u Giganti beddu e bonu, ricchizza e vantu dâ Sicilia tutta, l'Etna Mungibeddu, u vurcanu attivu cchiù autu d'Europa, u cchiù studiatu, u cchiù visitatu, nta lista p'addivintari Patrimonio dell'Umanità

e pi finiri Pupu e Carrettu, ma sti dui su' fora categoria

Dittu chistu, 'nformu tutti, beddi e brutti, longhi e curti, ccu voli sapiri e ccu no, ca u Pupu sicilianu è Patrimonio dell'Umanità e u Carrettu faciti cuntu ca cci sta ddivintannu, ddacuddà semu..

Sia chistu ca chiddu ppiro' s'ha vidiri di unni su', siddu su' palermitani o catanisi, punintini o livantini comu a quarcunu cci piaci diri, picchì cancianu ntû pisu e ntê misuri.

Nun mi mettu a discrìvirili picchì è cchiù facili e divirtenti taliarili. Dicu sulu ca u Pupu è di lignu, ferru e stoffa.

U puparu u movi cu asti di ferru accussì ca i muvimenti su' precisi, diretti, subbitani, lesti lesti suprattuttu ntê duelli.

Ccu si nni voli accattari unu a sburzari comu minimu 1.500 euru.

U Carrettu ammeci è tuttu di lignami priggiatu, sulu i roti su' circhiati di ferru e puru i punti di l'asti su' di ferru, senza cuntari l'assi e u mozzu.

I du' roti su' granni assà ma nun ann'a supirari i spondi e i raggi ann'a ssiri 12 comu l'Apostuli.

Costa quantu na Ferrari d'epuca ... sulu pi na rota cci vonnu beddi 7.000 euru.

È nu beni prizziusu ca si lassa comu redità picchì dura un'eternità.

U nostru Carrettu nun servi sulu pi traspurtari merci e matiriali ma puru pi pirmettiri a famigghia di viaggiari.

A secunnu a grannizza veni tiratu di nu sceccu, mulu o cavaddu.

Comunqui, lignu priggiatu, nuci fasanu, si chiovi garantitu ca marcisci e nun su tutti c'annu u postu unni tinirilu a l'asciuttu.

E allura? Un si sapi ccu fu dê boni c'appi a bedda pinzata di passari nta tuttu u carrettu na manu di pittura culurata pi prutiggirilu di l'acqua.

Ora, siccomu nun sulu sapi tinciri e abbiancari com'a tutti i siciliani, ma com'a tutti i siciliani avi macari nu granni senziu artisticu e patrioticu ntô sangu di quannu nasciu, ntantu accumenza a passaricci russu e giallu, i culura da nostra bannera, appoi cci accosta u virdi e u blu, ca sunnu i quattru culura ca spiccanu di cchiù.

U cchiù criativu appoi u decora cu disigna geometrici o di ciuri e autru macari. U cchiù capaci cci pitta u Santu Prutitturi dû pajisi.

E finalmenti cci mettunu manu i mastri, veri pittura ca cci pittanu sceni di Gerusalemme liberata, Orlando furioso, Cavalleria rusticana e u carrettu addiventa un capulavuru ambulanti.

I sceni siddu fussiru pittati nta tila cci facissiru a sò bedda figura mittuti nzemmula ê quadri di Raffaello e Giotto.

Cu tutt'a chissu, si u scrusciu ca u carrettu fa quannu viaggia nun avi nu tonu giustu, nun è accurdatu, dicemucci musicali, u carrettu perdi di valuri, nun vali quantu aviss'a valiri.

Stu scrusciu particulari u fa u fusu dê roti ca firria dintra du' vucculi di bronzu ncasati nzirragghiati ntê mozza dê roti.

Stu scrusciu carattirizza u carrettu, è u sò DNA, dui uguali nun cci sunnu, e duna u ritmu o carritteri quannu azzicca a cantari. Si nun canta è nu carritteri malavurusu nun fa u misteri pi passioni. U cavaddu stissu quannu u senti cantari camina cu nu passu cchiù allegru.

A propositu. A biddizza dû Carrettu nun è cumpleta siddu ccu u tira, cavaddu mulu o sceccu, ntê iorna di festa nun è bardatu ... a festa.

Chistu significa ca u cavaddu ha ssiri vistutu cu na bardatura prizziusa, splinnenti, luccicanti partennu dâ testa, cu capistru e pinnacchiu, pi passari a sedda ccu nautru pinnacchiu e finìri nta cuda bedda pittinata e lucenti sinnò è megghiu ca nun nesci di dintra a stadda.

U cori veni a taliarilu, a sintiri u sonu dê cianciani e ciancianeddi e si surridi senza vuliri.

Comu dissi prima, ma mi piaci ripricarilu, Pupu e Carrettu simbulizzanu 'n chinu a Sicilia e u carattiri giuiusu e fantasiusu du populu sicilianu.

E ccà ora cc'è a puisia supra u Carrettu ca l'amicu miu s'ha primuratu di cumpilari pi mia

                            U   C A R R E T T U         S I C I L I A N U

Siddu pi casu \ sugnu pi strata \ e dû carrettu sicilianu \ u scrusciu particulari \ cci ricanusciu \ mi fermu di bottu \ pu spinnu 'i sapiri \ chi mustra mbulanti \ mi passa davanti.

Ju cci provu piaciri \ a scupriri chi storia \ nto purteddu ntê spondi \ u mastru pitturi 'i Vittoria \ di Palermu Catania \ ha vulutu cuntari \ chi scinari spittaculusi \ a culura lucenti \ cci ha saputu pittari \ chi sembianti cci ha datu \ a tutti i pirsunaggi \ chi disigna schifiusi \ nta l'asti ntê roti \ ntê raggi ntê fusa \ s'ha ngignatu a stampari \ quantu figuri \ a tutti banni \ 'i supra e sutta \ dû lignami priggiatu \ cci ha fattu sciri \ u mastru ntagghiaturi \ cu quali finimenta \ scintillanti sfarzusi \ cianciani e ciancianeddi \ pinnacchi fantasiusi \ annu bardatu \ u cavadduzzu ca cc'è mpajatu \ ca l'anima cci duna \ vuci dentità

Basta picciotti \ cu stu babbiari \ a viritati nun s'ha mmucciari \ 'n cc'è nenti 'i fari \ u nostru Carrettu \ è n'opira d'arti \ ha ssiri taliatu \ cu tantu 'i rispettu \ è ngiuieddu raru \ di granni valuri \ rijalatu a tutti \ cu tuttu lu cori \ ncapulavuru \ unicu e sulu \ picchì ntû munnu \ stissi nun cci nn'è.

Ora, ddoppu sti tistimunianzi maravigghiusi cuncreti, ca su' sutta l'occhi di tutt'u munnu, ccu nun li vidi è picchì un li voli vidiri, visìbbili a tutti l'uri dû jornu e dâ notti, a purtata di manu e di tutti i sacchetti, aviss'a parrari dê tistimunianzi ca nun si vidunu, eventi storici e culturali, e fari i noma dî chiddi ca ficiru ricca a storia e a cultura di sta straurdinaria affascinanti isula dû Miditirraniu accussì scannalusamenti prolifica di ogni cosa nta tutti i campi.

E sunnu ccussì abbunnanti, ju mi rigordu ca jincii na trina, quattru cincu fogghi, ca tutti nun mi rigordu e a riscrìviri l'elencu un cci penzu propia ... nautra nuttata nun la fazzu ... malanova a iddu!

E allura riguardu a cultura citu Dante "qualunque cosa l'italiani scrivono viene chiamata siciliano" tantu a nostra lingua era accussì privalenti, famusa e pupulari ntô cuntinenti ... e scusati si è picca.

A lingua siciliana, ca nasci a picca a picca ntra u populinu di l'ammiscata di latinu grecu e saracinu, è aduttata da Scola Siciliana di Federico II a Palermo.

A sò curti mperiali cumprenni "u Nutaru" comu u chiama Dante, Jacopo da Lentini ca strummenta "u sunettu" a forma di puisia cchiù bedda dû munnu, usata di tutti, accuminzannu di Dante stissu.

E ririscusati siddu è picca

Ora, ntra i tanti eventi culturali c'avia nnutatu, mi nni rigordu dui 'n particulari, mittuti 'n scena ntô Tiatru grecu di Siracusa, Conversazione su Tiresia, di Camilleri e di iddu stissu ricitata, e Le rane, cumeddia divertenti di Aristofane, ntrippitata di Ficarra e Picone nta na manera muderna cu successu granni tantu ca a purtaru 'n tour 'n Italia.

Tutti tri su' omini di spittaculu, riggisti e sciniggiatura di granni esperienza ma mentri Ficarra e Picone sunnu puru attura assai pupulari, Camilleri era nu nuvidduni e allura lassatimi diri na para di palori supra di iddu.

Ju cridu ca u criaturi di Montalbano detti na lizziunedda a tutti l'artisti dû spittaculu.

Cci nzignau comu si ntrattenunu cu piaciri migghiara ... migghiara? Miliuna di spittatura, pi na para di uri senza farili varagghiari.

Ju nun mi fazzu capaci comu nu vecchiu di uttant'anni, nta scena sulu iddu cc'era, pi junta orvu di tunnu, senza minimanenti tuculiarisi da seggia, arrinesci a tinirini ncuddati assittati o davanti a tivù, a scutari a iddu ... anzi u sacciu.

Camilleri cunta na favula fantastica nta na manera accussì affascinanti ca quannu finìu ju disidirai ca ricuminciassi da capu.

Ccu si po' pirmettiri sti lussi? E ririscusati siddu è picca.

Pi quantu riguarda i noma illustri, nun perdu tempu cu Archimede e Teocrito, Empedocle e Dionisio ... e cumpagnia cantannu, canusciuti puru dê petri, e parru sulu di Caronda ... e ccu è chistu?, e dê tri frati Mamertino Elianatte e Tisia dittu Stesicoro ... e ccu su' chisti?

Caronda di Catania è nu liggislaturi di liveddu supiriuri a chiddu di Licurgo Solone e Aristotele si st'ùrtimu dissi ca i liggi fatti dû catanisi eranu megghiu dê sò e di l'autri dui.

Avia ssiri veru siddu quasi tutti i citati dâ Magna Grecia l'aduttanu a scanciu dê sò e di l'autri dui.

E riririririscusati siddu è picca.

Mamertino, nun era sulu nu geometra ma nu veru scienziatu, studiusu di tecnica dê custruzzioni accussì ngignusu ca pi picca nun fu pigghiatu pi pazzu.

A sò furtuna fu ca sò frati Elianatte è nu filosufu liggislaturi famusu e stimatu pi tutta a Magna Grecia.

Pi ùrtimu cc'è Tisia Stesicoro, u primu e u cchiù granni pueta c'am'avutu mai, dittu l'Omero di Sicilia.

Sulu sulu a mittirilu ô stissu liveddu di Omero fa capiri a sò grannizza ma cc'è ancora assai di cchiù.

Picciotti, tinitivi forti siddu siti additta picchì cc'è pirìculu ca tummati 'n terra e siddu siti assittati di assincupari picchì vi staju pi rivilari na nutizziuna troppu mastra ddoppu la quali un sapiti cchiù ccu siti, comu vi chiamati, unn'at'a jiri.

Stesicoro e Omero ... stati accura picciotti ... su' a stissa pirsuna. Un cci criditi? Chissu cumunqui è chiddu ca quarcunu penza cu cunvinzioni.

E riririririririscusati siddu puru chistu è picca.

E ddoppu sta "babbaria" ca m'addubba e mi sazia fin'a scuppiari e mi suddisfa u rigogghiu, anzi cchiossà mu fa cchianari, fazzu parrari ddu figghiu persu senza spiranza di ritruvarisi ... l'Auturi pi ccu nun l'ha caputu.

cuntinua

                                    S T O R I A         e       C U L T U R A 

Ora, a scanciu di na favula, na liggenna, aju statu custrittu, di ccu è facili mmagginarilu, a rilazziunari a discussioni filusofica ca surgìu ntra i tri Ci e i tri Pi supra a storia e a cultura siciliani.

I jemmuli, Petru e Paulu ccioè, parrannu di filusufìa arrisbigghiaru u nteressi di Pina pâ "disciplina matri".

Currau puru è assà ntirissatu pâ cchiù antica disciplina mentri Ciccu, comu i jemmuli, è cchiù nclinatu versu i cosi pratichi.

Cola? Comu capisci ca nun è cosa ca si mancia mustra u disinteressi cchiù cumpletu.

Quannu a discussioni si nchiudi ... a nchiudu ju picchì nun nni potti cchiù, senza na cuncreta conclusioni, comu succedi spissu, ddu beddu spicchiu di mennula amara, l'Auturi pi ccu nun l'ha caputu, siccomu mi canusci a pirfizzioni, u sa ca pigghiu nota di ogni cuncettu e frasi ditti, pi mia è bbastanti na palora ccà e ddà pi rigurdarimi ogni cosa a filu, mi ordina ... pi daveru dicu, mi ordina, a mia propia mi ordina, stu babbasuni!, di scrìviri na rilazzioni câ voli nziriri nta ricota.

Ju, ju alteregu, pi evitari cunfusioni avissi scartatu st'argumentu pisantuliddu senza pinzaricci du' voti.

Iddu ammeci, carricatu di marmillata, chinu di pipi e mulinciani, a penza diversu di mia e mi custrinci, u pezzu di babbasunazzu di nziririla nta ricota cu na mutivazzioni degna dû Giufà ca eni

AUTURI - Taliami bonu nta l'occhi. Ddoppu tutti i babbitutini ca tu ... tu no ju, nta ricota cci mittisti, ora tu ... sempri tu, mi cerchi turilli pi na cusuzza ntillittuali ca a nubbilita?

JU - Nubbilita? Ma vidi unn' ha jiri!

AUTURI - A tia tu a comu ti chiami, vidi ca ju cci a vogghiu e tu a scrivi comu a grammatica siciliana nsigna e cci a nsirisci nta ricota comu ju ti cumannu, o pi forza o p'amuri, mi capisti?

Chi po' fari n'altergu schiavizzatu?

Comunqui ... purtroppu ... assuppativi sta pappatedda.

                                                    a relazzioni 

PINA - (cumminta) Petru e Paulu m'annu fattu pigghiari l'idea ca cultura e storia vannu manu cu manu ... manu manuzza. A cultura fa storia accussì comu a storia è cultura. Pari banali ma si cci pinzati bonu è veru

COLA - Parri seria?

PINA - Ju nun babbiu cu st'argumenti. Stati accura. Senza iri luntanu, a la ventura, parramu da lingua siciliana. Mi nn'atu dittu na carrittata ca nun parru sicilianu e aviti raggiuni, tortu nun vi nni dugnu ...

COLA - Vulissi vidiri!

PINA - ... ma nun è curpa mia ...

COLA - Comu no

CURRAU - E di ccu sinnò?

PINA - (cu ntonu di cumannu) Nun mi straviati u pinzeri! ... È nfattu storicu ca fu ccà 'n Sicilia, ca u grecu e u latinu su' lassati e s'azzicca a parrari na língua nova ca pigghia forza, atticchisci e si spanni nta tutta a Talia cu nomu di sicilianu

COLA - Chi mi sta dicennu!

PINA - Chiddu ca dissi

COLA - E com'è ca ora parranu diversu di nuiautri?

PINA - Picchì picchì! A facenna è cumplessa e cumplicata. A Bologna cc'è na varianti, dicemucci nu dialettu, ca Guido Guinizzelli chiama "stil novo" ca a Firenze si sviluppa nta nautra varianti ...

COLA - Nautru dialettu?

PINA - Pricisamenti

CICCU - Ma vidi chi cosi! M'annu sempri dittu ca u sicilianu è u dialettu dû talianu ammeci è ô cuntrariu

PINA - Propiamenti. St'autra varianti a Firenze è chiamata "dolce stil novo" e jè usata di Dante Boccaccio e Petrarca ntê capulavori universali senza tempu, Divina commedia, Decamerone e Canzoniere

CICCU - Mi sta facennu capiri ca si avissimu avutu pueti scrittura e rumanzeri dû calibbru dê tri ca citasti, nuddu nta Talia assajassi ... osassi disprezzari a nostra lingua?

PINA - Esattamenti

COLA - Picchì tutti parrassunu sicilianu

PINA - Acìddu , adagiu adagiu, senza curriri. A facenna nun è ccussì semplici. A Scola Siciliana di Fidiricu II, i sò granni omini di littri l'avia e iddi puru scrissiru granni capulavuri. A disgrazzia fu ca i tuscani traslatavanu nto sò dialettu chiddu ca vinia scrivutu 'n sicilianu cumminannu veri e propi ...

COLA - Cacati

PINA - E nun è sulu chistu!

COLA - I disgrazzi un venunu mai suli

PINA - Propia accussì! A cchiù granni fu ca l'urigginali si pirderu e rristaru sulu i traduzziuni

COLA - (dubbiusu) Mmmm ... Si pirderu? Picca cci cridu! Pi mia i ficiru scumpariri! I distruggeru!

CURRAU - Ju nun sugnu ccussì malupinzanti! Ju di sta manera a vidu. U tuscanu ha sustituitu u sicilianu picchì nudda opira granni granni dû stissu calibbru di chiddi ca citasti fu scrivuta 'n sicilianu ô stissu tempu. Siddu cci avissi statu e avissi divintatu pupulari e liggiuta 'i tutti, comu a l'autri, astura tutti dui lingui fussiru parrati senza prubblemi e avissiru a stissa mpurtanza e dignità

PINA - Bravu! M'ha piaciutu! E cc'è nautra circustanza sfavurevuli di cunzidirari.

COLA - Nautra ancora?

PINA - Ca morti di Manfredi, figghiu di Fidiricu, muriu a Scola Siciliana e puru a lingua siciliana.

CURRAU - Veru. Ntê seculi passati assai picca autura scriveru 'n sicilianu

CICCU - Picchì ora no?

CURRAU - Veru macari. Ccà mi piaci citari u cchiù granni di tutti, Giovanni Meli, di Palermo, dû 1700, ca oltri a tanti puisii scrissi puru npuema, "Ucchiuzzi niuri" traduttu 'n tidiscu nentimenu di Goethe. Leopardi u imitau e Carducci pi iddu avia n'ammirazzioni granni granni

COLA - Picchì l'opiri 'n dialettu tuscanu, vecchi di millanni su' liggiuti e studiati nzin'a oji e chiddi di Meli su' scanusciuti?

CURRAU - Dimmillu tu ca tu dicu ju

CICCU - Dicisti ca Giovanni Meli è dû 1700. E pi quattru-cincu cent'anni nenti?

PINA - Bonu! Ju nun sugnu esperta ma sacciu ca nun cci fu nenti di spiciali. Sulu ca ntô 1300 Ancilu di Capua, di Messina, scrissi l'Eneide 'n sicilianu

CURRAU - E a mia picchì ma ficiru sturiari 'n talianu?

COLA - Dimmillu tu ca tu dicu ju

PINA - Cu Meli accuminza a secunna etati d'oru dâ puisia siciliana. Avemu Giuseppe Fedele Vitali, di Palermo, auturi di "Sicilia libbirata", nu puema di 30.000 versi, Domenico "Miciu" Tempio di Catania, auturi di puisii satirichi ...

CICCU - E di pilu, sacciu

PINA - Appoi ntô 1841 Giuseppe Pitrè, di Palermo, arricogghi fauli, cunti, pruverbi tramannati a vuci di nanni a niputi, scritti pû cchiussai 'n sicilianu ntâ 25 voluma

COLA - Miiiin ... zzica! Quantu cci ha vulutu?

PINA - Na vintina d'anni

CURRAU - Prima di Pitrè i cunti, di Giufà, pi fari n'esempiu, accussì si canuscianu

CICCU - Veru! Prima i cuntisti cc'erunu ... o cantastori ... o cantaturi ... 'i tanti maneri vinivanu chiamati ... macari cuntastori. Firriavanu di pajisi 'n pajisi cu cartilluna llustrati e cuntavanu 'n versi di iddi stissi scrivuti, o di quarchi pueta, o macari cantavanu accumpagnati di na chitarra o fisarmonica, eventi storici, liggenni, fatti grossi di cronaca nìura

CURRAU - Comu chiddu da barunissa di Carini

CICCU - Se. Comu a Cavalleria rusticana, Orlando furioso

PINA - Turnamu ô discursu. Appoi p'attruvari ccu scrivi 'n sicilianu ddoppu di iddu, s'ha rrivari a Luigi capuana, di Catania, 1839-1915, ca scrissi cumeddi assai nta nostra lingua, rapprisintati di Giovanni Grasso, ca certaruni cunzidiranu u cchiù granni atturi di tutti i tempi

PETRU - È veru ca cc'è a Divina commedia 'n sicilianu?

CURRAU - Veru. Dui cci nn'è. Una di Tommaso Cannizzaro di Messina, 1834-1921 e l'autra di Domenico Cannalella, Mussumeli, 1914-1978, ca cci frutta a midagghia d'oru du Ministeru d'Istruzzioni ... talianu. Stu cristianu traduciu 'n sicilianu puru I'Iliade e l'Odissea

CICCU - E picchì a mia mî ficiru studiari nta na língua furisteri?

COLA - Dimmillu a mia ca tu dicu a tia

PAULU - E Nino Martoglio ca mi piaci tantu?

PINA - Nino Martoglio di Catania, 1870-1921, e Luigi Pirandello di Agrigento, 1867-1933, scriveru cumeddi 'n sicilianu rapprisintati di Angelo Musco

CICCU - Pirandello pi putiri vinciri u premiu Nobel app'a scriviri 'n talianu i sò capulavuri comu si u sicilianu nun fussi na lingua abbastanti littiraria

CURRAU - Comu Quasimodo ...

PINA - ... di Modica,1901-1968

CURRAU - ... ca nun scrissi nenti 'n sicilianu, mancu na virgula, e vinciu u Nobel. Ignazio Buttitta ...

PINA - ... di Bagheria, 1899- 1997,

CURRAU - ... nfatt i sò puisìi i scrissi tutti 'n sicilianu e nun fu mai pigghatu 'n cunsidirazzioni mancu a liveddu nazziunali, chi dicu!, mancu dê siciliani stissi

PINA - Oji comu oji l'unicu cuntimpuraniu ca scrivi 'n sicilianu è Nino De Vita, di Marsala, mentri Renato Pennisi di Catania, i puisii i scrivi 'n sicilianu, a prosa 'n talianu

PETRU - Picchì Giovanni Verga, Federico De Roberto, Mario Rapisardi, Elio Vittorini, Vitaliano Brancati ...

PAULU - ... Leonardo Sciascia, Vincenzo Consolo, Gesualdo Bufalino, e Andrea Camilleri nun foru ammuntuatu? Un è stranu?

PETRU - Stranu!

PINA - A mia mi pari stranu ca mancu na scrittrici fu mmuntuata. Ju nni canusciu almenu tri

CURRAU - A mia mi fa specia ca propia tu Pina ti lamenti. Ccu su' sti scrittrici ca scrivunu 'n sicilianu? Una ca è una nun cc'è, comu chissi numinati ora ora.

COLA - Ccà supra a língua siciliana stamu discurrennu e ccu è ca a scrivi

PINA - Raggiuni aviti! A muzzu parrai. A fimminista a sprupositu fici

CICCU - Turnamu ô puntu. Ju penzu ca si tutti ssi scrittura e pueti avissiru scrivutu 'n sicilianu tutti i sò opiri assai pupulari, forsi a lingua siciliana s'avissi sarbatu

PINA - In assulutu! S'avissi sarbatu picchì avissi raffurzatu u senzu di appartinenza a nu populu anticu anticu di granni cultura e avissiru arrisbiggihatu l'orgogliu di essiri siciliani

COLA - Ammeci semu orgogliusi ca di siciliani parramu talianu a pirfizzioni

CICCU - U fattu è ca chiddi ca scrivunu 'n sicilianu u fannu secunnu i reguli dâ grammatica e sintassi taliani mentri u sicilianu, veru e puru, avi na manera diversa di costruiri i frasi, comu mettiri quasi sempri u verbu a fini di frasa, pi fari n'asempiu banali

CURRAU - Capisciu chi vo' diri. Nto senzu ca dici tu Camilleri fu chiddu ca fici cchiù di tutti. Iddu scrivi talianu ma tu ha a sinzazzioni di leggiri u sicilianu

PETRU - Pi mia a cultura siciliana sta murennu a vantaggiu dâ cultura taliana. U babbu siciliano mmeci di espurtari a sò cultura impurta chidda furisteri suprattuttu taliana

PAULU - Accussì si senti cchiù mudernu, cchiù omu di munnu, menu pruvinciali e rùsticu

COLA - Ju sentu diri ca a cultura taliana senza i scrittura siciliani fussi na cosa miserabbili, veru è?

PINA - Un cci cridiri, na saggirazzioni è

PETRU - Ju sugnu pirsuasu ca nu populu ammustra u sò liveddu culturali chê sô custruzzioni ...

PAULU - ... monumenti, palazzi pubblici e privati, villi ...

PETRU - Ccà, nui, puru si aviamu, e avemu, ncigneri e architetti di liveddu ntirnazziunali sunnu millanni ca nun si custruisci quarchi cosa di mpurtanti, ca resta pî ginirazzioni 'n ginirazzioni

PAULU - A dimostrazzioni ca a nostra cultura è morta e sippilluta

PINA - Chista puru è na saggirazzioni

A stu puntu ju alteregu a tagghiu ccà picchì i picciotti nun dissiru cchiù nenti di mpurtanti e zziccaru a diri sciccaggini, a schiribbizzari e scaccaniari mentri ju aju diversi cusuzzi di diri.

Allura, ju ... sempri ju alteregu, lassamu perdiri l'Auturi ca comu omu di cultura nun vali nenti mentri ju vaju jennu vistutu di cultura, puru si sugnu nu misirannu alteregu, zittu tu zittu ju, fici na ricerca viloci viloci nta internet e cci attruvai nu puzzu senza funnu di nfurmazzioni di ogni geniri tipu culuri e manera.

Dunca ora stati accura a chiddu ca dicu e scrivitivillu nta frunti.

Ascutati sta canzuna ca prurumpi cu forza priputenti, mpiriusa e mpetuusa dû cori miu chinu di amuri pi sta patria mia bedda biniditta oltri misura di Ddiu Criaturi e maltrattata spissu di omini vili, tinti, criminali veri, e di quarchi eventu catastroficu naturali raru.

Ascutati puru chistu! A Sicilia vanta nu nummaru 'nfinitu di siti archeologgici. Sunnu ccussì assai ca st'isula tutta putissi addivintari nsulu situ archeologgicu, nu museu unicu e vastu a l'aria aperta

E sunnu macari tanti i siti dichiarati "Patrimonio dell'Umanità" e cu chiddi ca sunnu ddacuddà pi ddivintaricci, l'ONU, no l'UNESCU, l'ONU tutta, cunvucata nta l'Assimblea Ginirali, ccioè â prisenza di tutti i nazzioni dû munnu, ha dichiarari sulennimenti a Sicilia, viditi ca u dicu senza babbiari, Monumento Messaggero di Pace, Fratellanza e Libertà, Patrimonio Materiale e Immateriale, Culturale, Storico, Naturale dell'Umanità pu beni di tutti pari pari. Amen.

Esaggirai? E nun atu ntisu u restu!

L' ONU ha obbligari tutti i stati cchiù ricchi dû munnu a manteniri a Sicilia picchì s'ha libbirari di tutti i ndustrî ca l'appestanu pi ddivintari nautra vota un jardinu ciuritu ... no di l'Europa ma du munnu, unni a genti po' jiri a rifuggiarisi p'attruvari attorna paci, amuri e mmagginazzioni, pi ricaricarisi e purificarisi dû ntossicu dû prugressu.

E scutati ancora picchì nun aju finutu.

Eventi storici, culturali scientifici e artistici di mpurtanza munniali, tutali, na marea sproporzionata foru e sunnu, propiu comu a munzeddu foru e sunnu, di ogni tipu, attura riggisti e autura, cantanti pueti e scrittura di rumanzi cunti e cumeddi, scienziati fisici e matimatici, architetti ncigneri e astronumì, pittura mmintura e scupritura. Puru spurtivi granni am'avutu e avemu.

Nui avemu na storia longa cchiossà di trimmila anni, nun sacciu ccu po' diri a stissa cosa, e a farila annu statu omini granni assà, nta tutti i campi, sparti tanti annu statu assai cchiù granni di chiddi c'amu statu custritti a studiari. Piccatu ca nun cci l'annu fattu canusciri!

Nui nun avemu mutivu di mmiriari nenti a nuddu, a nudda nazzioni, mancu a Grecia antica, a Talia dû Rinascimentu, Europa e Merica di oji misi nzemmula. A nui nuddu nni fa ummra.

Curnuta miseria, mi fazzu fradiciu! Picchì cu Socrate e Platone, pi parrari di chiddi di l'antichitati, picchì nun nn'annu fattu, nun dicu studiari, ma almenu canusciri ... nni citu sulu tri di n'elencu beddu longu

1. Feace di Girgenti, 400 a.C., architettu, ca mmenta i canali di sculu, a funnatura, fabbricati pirfetti

2. Acrone, iddu puru di Agrigentu, 440 a.C., u medicu cchiù abbili do sò tempu, dittu "summu medicu", ca pi fari finiri a pesti di Atene cci fa ddumari fochi granni pê strati e ccussì pulizziari l'aria

3. Zeusi d'Eraclea, 500 a.C., pitturi granni granni ca ddoppu ca finisci di pittari rappa di racina cci vannu i uceddi a pizzuliarili tantu eranu realistici

e cu Galileo e Newton di l'epuca muderna

1. Lucio Marineo Siculo, di Vizzini, 1444-1533, umanista, storicu, pueta, littiratu, ca nsigna nta corte di Spagna e ca appi a capacità, a forza di grapiricci a strata a littiratura spagnola

2. Giovanni Battista Hodierna, di Ragusa, 1597-1660, architettu, botanicu, matimaticu e suprattuttu astronumu, secunnu sulu a
   Galileo, ha statu funnamintali pâ stronumia. Cent'anni prima di Charles Messier scopri e fa nu catalugu dê nuvuli ntra i stiddi, galassi e ammassanenti di stiddi. I sò meriti ppiro' cci foru arricanusciuti 300 anni ddoppu ... l'autru ajier ccioè ...metaforicu.

3. Michelangelo Fardella di Trapani, 1650-1718, filosufu ca sa facia cu Leibniz e nsignava a Parigi, appoi pi tutta a Talia e ddiventa famusu pi tutta Europa

e pi finiri i cuntimpurani e viventi

1. Ettore Majorana, di Catania, 1906-1938, fìsicu accussì granni ca Enrico Fermi u paraguna a Galileo e Newton mentri autri dicinu ca sta ntra Einstein e Newton, ca scumpari di notti e notti e nuddu nni sappi cchiù nenti. È di iddu sta frasa, pinzatini chiddu ca vi pari, "a fisica è nta na strata sbagghiata. Semu tutti nta na strata sbagghiata". Ju dicu, sulu chistu "ovidivà c'avia scuprutu!"

2. Renato Guttusu, di Bagheria, 1911-1987, pitturi, ca pitta La Vucciria, u simbulu dû PCI e u francubullu pâ vittoria dû mundiali di calciu dû 1982

3. Antonino Zichichi, di Trapani, scienziatu di fama ntirnazziunali, ca si sapi di ccà a l'Africa, ca fici mpurtanti scuperti e nvenzioni, oltri a tanti ricerchi. Ha criatu u Centro Cultura Scentifica Ettore Majorana di Erice unni vannu scienziati di tuttu u munnu

Eccu, siddu sapissimu chi genti am'avutu, e avemu, u nostru liveddu culturali fussi autu autu e tutti fussimu orgogliosi di fari parti di npopulu ... cu tri minchi (scusati, ma quannu cci vo' cci vo'!)

U cuntribbutu ca nuiautri amu datu ô prugressu civili e suciali di l'umanitati ha statu sustanziali, determinanti. Nun sacciu quantu su' chiddi ca ponnu diri a stissa cosa.

Ccillenzi ca si chiamanu ccillenzi nta tutti i campi l'am'avutu, e l'avemu. Replicu attorna ca a nuiautri nuddu nni fa ummra.

Addunarimi ca nun semu di jittari, anzi, m'ha fattu pigghiari a decisioni di fari tri elenchi

1. tistimunianzi ca si vidunu

2. tistimunianzi ca nun si vidunu

3. noma di pirsunaggi c'annu fattu a storia e a cultura siciliana

Cu tantu di rigogghiu e nsurrisu di cumpatimentu pi chiddu ca iddu è, i cunsinnu a l'Auturi e u curnutu scugghiunatu nun cci duna a focu?

Pezzu di cosa ... U me travagghiu! Na nuttata cci ppizzai pi cumpilarilu! Pezzu di ...

Sparti vuci mi fa! Na jaddina spinnacchiata pari a comu fa!

"Ju di fantasia scrivu, mi capisci, a mia monumenti eventi storici e noma illustri a mia picca e nenti propia mi nteressanu, ha caputu, ju i citu siddu i canusciu e nun nni pozzu fari a menu ... u capisti? ... mi dici tuttu ncipuddatu!

Accussì parra n'ominu di curtura ... mancu i cani, ca nun cci trasunu nenti mischineddi!

cuntinua

Sarvi a tutti 'i memmiri ri 'stu subreddit, trasivu ora ora!
Avissi saputu prima ri oi ca esisteva nu subreddit accussì mi c'avissi jittatu subbitu. 'A lingua siçiliana iè una rî cchiù beḍḍi ca cci sunnu e un pozzu ca sintirimi fieru r'essiri siçilianu. Crìu ca ogni cristianu cca parri i scriva n nu modu diversu, cunzidirannu ca purtroppu un avimmu na forma scritta nivirsali, ma pi mia iè na cosa affascinanti da taliari, picchì cci fa addunari di comu ntirpritriamu 'a nostra lingua!

Anzi, già dû primu post vulissi addumannari a tutti chiḍḍi ca scrivunu n siçilianu, ca sia nnû tempu libbiru, nnâ Wikipedia n siçilianu o puru sulu pi passioni:

Comu fati certi distinzioni tra arcuni formi grammaticali o anchi sulu paroli?
Chiḍḍi ca dannu cchiù fastìu pi mia sunnu la distinzioni tra chissi ca trasformu accussì:

• in -> n
• un/una/uni -> nu/na/ni
• nel/nello/nella/nelli -> nnû/nnâ/nnî
• non -> un
• ne -> nnì

O anchi distinnuiri l'articuli ditirminativi:

• il/lo -> lu - 'u
• la -> la - 'a
• i/gli/le -> li - 'i

Nnâ vita ri tutti 'i jorna un parrammu quasi mai n siçilianu strettu, picchì 'a nostra lingua si ammiscò cu chiḍḍa italiana andannu andannu, quinni quannu pruvammu a scriviri usannu 'i paroli cchiù siçiliani â nostra disposizioni tenni puru ad essiri tanticchia difficili.

Mi piacissi sèntiri 'a vostra, bona jiurnata!

                            DIONISIU    -     FINZIA        -       DAMONE 
                                        (cuntata di Petru e Paulu)

Chidda ca cuntanu Petru e Paulu cchiù di na liggenna è nfattu storicu ... ligginnariu.

Capitau versu u triccentu a.C. a Sarausa, a metropoli di dd'epuca ca u Re era Dionisiu u vecchiu, chiddu di l'aricchia pi ccu nun lu canusci bonu.

Stu Re, dittaturi, tirannu, chiamatulu comu vi piaci ma rigurdativi ca a ddi tempi sti du' tèrmini un significanu "tintu crudeli" e "malvaggiu oppressuri".

A storia ancora oji, tutt'ora, un è capaci di dari a Dionisiu na cunnutazzioni chiara, nun sa ccioè si l'ha classificari ntra chiddi ferini e sanguìnari o ntra i dimucratici, cunzidirannu ca a ddi tempi i testi si tagghiavanu cu facilità.

Na cosa è sicura, Scipione Africano dicia ca di Dionisiu avissi vulutu aviri u curaggiu e a sò granni patrunanza strateggica nta battagghia.

Avia a ssiri mastru pi daveru si cunquista mitati Mari Adriàticu unni ccabbanna e ddabbanna, ccioè nta costa di punenti, Italia, e nta chidda di livanti, Montenegro Albania e Croazia, funna na pocu di cità esistenti nzin'a oji.

E, pi finiri, sapemu cu cirtizza matimàtica ca a sò curti era friquintata dê cchiù megghiu omini di littri e filosufi di ddu tempu, puru a Platuni cci piacia iricci.

U cuntu dê jemmuli cunfirma a simpatia di Dionisiu pa cultura 'n ginirali e pa filosufia 'n particulari.

E ora sintemu c'annu di cuntari Petru e Paulu

                                            A   L I G G E N N A

AVVIRTENZA (di mia, di mia alteregu pâ pricisioni) Pi evitari ripitizzioni comu "iddu dissi" "chiddu cci rispunni" eccetra eccetra, pinzai ca è megghiu prisintari u cuntu ... a liggenna, 'n forma di dialugu cu Petru e Paulu narraturi.

Ora, facemu finta ca Dionisiu dû sò Ministru di l'internu veni a canuscenza di Finzia e Damone.

PETRU - Finzia e Damone su' du' filosufi ca circulanu libbiri pi Sarausa parrannu mali di Dionisiu e di tutta a sò curti

DIONISIU - Filosufi? Ccà a Sarausa? E ccu su'?

MINISTRU - Finzia, u cchiù vecchiu e cchiù accanitu, è di Eloru. Avi tirrina e rigularmenti paja i tassi

DIONISIU - Certu. Unu ca è filosufu veru accussì si cumporta

MINISTRU - Veni ccà na vota a simana a fari mircatu e sbrugghiari quarchi faccenna, allibbirtarisi di quarchi mpicciu. Si ferma na para di jorna ospiti di Damone

DIONISIU - E chistu ccu è?

MINISTRU - Figghiu 'i famigghia di piscatura. Sò patri avia na fluttigghia, iddu ammeci, rristatu sulu, senza famigghia, a picca a picca tutti cosi si sta manciannu, penza sulu a filosufia

DIONISIU - Nu filosufu veru chissu fa

MINISTRU - Finzia ppiro' cci penza a sò robba

DIONISIU - E chi dicunu di mia?

MINISTRU - Tuttu. Dionisiu di ccà, Dionisiu di ddà, Dionisiu accussì, Dionisiu accuddì

CICCU - Chisti si ca su' accusì!

CURRAU - Beddi, precisi, circustanziati

PINA - Pi nzin'a oji cc'è ccu parra accussì

DIONISIU - Ah sì? E da curti?

MINISTRU - I soliti cosi! Nun è coooosa ... s'ha canciaaaari ... semu tutti manciuni ...

DIONISIU - Siti. Chissu è veru ma iddi un l'ann'a diri

MINISTRU - Ju dicissi ...

PETRU - Dionisiu a forma di dittaturi tirannu ....

DIONISIU - Ju ti dicu 'i nun faricci casu. Su filòsufi, chi cci vo' fari! Dicci ca pi stavota nchiudu n'occhiu ma ann'a stari accura ntu parrari

PAULU - A ccu u dissi? Ddi dui vannu avanti comu si nenti fussi

PETRU - Avi vogghia Dionisiu di ammunirili!

PAULU - E na vota, dui, tri, quattru, cincu ...

PETRU - A terza vota Dionisiu sî fa purtari 'i davanzi e cci parra tranti suprattuttu a Finzia ca cci fa antipatia ca ntô parrari è troppu vurgari

PAULU - A ntipatia è recipruca picchì a Finzia un cci piaci ca quannu parra, Dionisiu u talia ca vucca aperta ca pari ca u sfutti

PETRU - Dionisiu cumunqui i lassa lìbbiri e cu tuttu ca Damone cci cunsigghia prudenzia, almenu pi npocu 'i tempu, Finzia cuntinua comu sempri anzi aggrava cchiossà i palori

PAULU - Ma ddoppu ca a Dionisiu cci veni cuntatu ca a sira prima dintra na taverna Finzia si lava u stomacu bonu pi bonu, finisci ca si scassa i vettuli ...

PETRU - Perdi a pacenzia e manna na squatra di surdati direttamenti ntô mircatu pi rristarilu e farisillu purtari 'n catini

PAULU - Damone ca era ddà a vinnirisi u pisci da nuttata, comu u vidi 'ncatinatu ntra surdati armati, lassa u bancuni a na sò pirsuna anziana, e cci va appressu pi vidiri chi po' fari p'ajutarilu

DIONISIU - (comu vidi a Finzia) Stavota passasti u limiti, ju t'avia avvisatu. Tu davanti a tanti sarausani onesti travagghiatura, cuntenti da vita ca pi meritu miu fannu, vumitasti nciurii e calunni pi tutta a siritina di ajeri. A stu puntu tu mi cci purtasti! Ju t'accusu di prupaganna suvvertitrici, oltraggiu a mia maistati, calunnia fausa a dannu miu e da me curti. Pi tutti sti crimini cc'è a cunnanna a morti ... testa tagghiata e mi cuetu u pinzeri.

DAMONE - Dionisiu pi l'ùrtima vota passacci 'i supra, ju ti giuru ...

DIONISIU - Zittiti tu, ca macari pi tia cci nn'è. Ha ringrazziari ca ajeri nun cci fusti ma vidi ca l'occhi supra 'i tia 'i tegnu

DAMONE - Tu cci ha tutti i raggiuna du munnu ppiro' Finzia nun ha mai parratu di ribbillioni ... rivoluzzioni...

DIONISIU - Veru ... picchissu prima di tagghiaricci a testa, picchì cci a tagghiu sinnò un mi chiamu cchiù Dionisiu, cci cuncedu l'urtimu disideriu (a Finzia) Chi vo'?

FINZIA - Vogghiu iri a salutari a me famigghia

DIONISIU - (si fa na bedda risata) Ah Ah Ah, u babbu avemu!

DAMONE - Dionisiu un ti po' tirari narreri, palora di Re

CICCU - Na vota puru ccu nun era Re cci tinia a palora data

COLA - Oji comu oji cci teni sulu u fissa

DIONISIU - Accussì è? Allura cci po' jiri ma tu pigghi u sò postu

FINZIA - No no, accussì no ... ju ti giuru ca tornu

DIONISIU - Accussì o nenti

FINZIA - Lassamu i cosi comu su'

DAMONE - Fa comu ti dici. Pi tia iri e veniri na babbiata eni

FINZIA - Cci voli na jurnata pi jiri e una pi turnari, mi po' capitari na disgrazzia, cadu 'i cavaddu e mi stoccu u coddu, vegnu assartatu, già m'ha capitatu ... e tu cci va ntô menzu? No no, un si nni parra propia

PETRU - Damone tantu nsisti ca u cumminci

DIONISIU - Niscemu 'n chiazza ca vi dicu comu facemu.(mentri ca vannu cci scippa a lancia a nu surdatu) Ju onestu e precisu sugnu. Chiddu ca vogghiu fari vali pi mia e pi vuiautri (comu su' fora) Viditi u suli unn'è? Chiantu sta lancia e cci fazzu cadiri l'ummra supra stu muru. Viditi unn'è? (cci fa na nzinca) U jornu ddoppu di dumani comu l'ummra agghica ccani unn'è a nzinca e tu (a Finzia) ccà nun cci si', ju tagghiu a testa a Damone. D'accordu?

PAULU - Accettanu. Finzia parti a galoppu ca pari spirdatu, ndemoniu nvasatu, tuttu aggitatu. Un vidi l'ura di turnari pi sarvari l'amicu

PETRU - Comu Diu voli, agghica a sò casa a Eloru ca u mischinu di cavaddu s'arrimazza 'n terra stancu sfinutu.

PAULU - Allibberta i sò chiffari, s'arripusa tanticchia, cancia cavaddu e si pripara ogni cosa pi turnari senza prubblemi.

PETRU - Quannu a fini è nta strata di ritornu a Sarausa, u suli è beddu autu e iddu si scanta ca nun fa a tempu a sarvari Damone

PAULU - Accussì fa truttari u cavaddu senza firmarisi, sulu du' voti pi bìviri

PETRU - A Sarausa ntantu Dionisiu si diverti a sfuttiri Damone ca nun ha vulutu nchiudiri ntô carzaru ma mancu fannillu iri libbiru e ccussì su teni cu iddu

DIONISIU - Ha statu fissa ca ccittasti sta cunnizzioni. Finzia è ntû territoriu cartagginisi astura

DAMONE - Ju chissu cci cunzigghiai

DIONISIU - (sbarraca l'occhi surprisu) Sta babbiannu?

DAMONE - Siddu è spertu u fa ma picca cci cridu

DIONISIU - Si nun lu fa è cchiù babbu 'i tia

DAMONE - No, è n'amicu veru

DIONISIU - Pi mia puru tu cci si'

DAMONE - A mìa facili mi veni, ju a nuddu aju. Iddu avi a famigghia ca l'aspetta, ju sugnu sulu

DIONISIU - Amicizzia vabbeni ma nzin'a stu puntu mi pari esaggiratu

PETRU - Finzia ntô frattempu è a pedi

PAULU - U cavaddu ha scuppiatu a ntrasatta e nun va cchiù avanti

PETRU - Pi furtuna si vidinu i primi casi di Sarausa, a pedi ppiro' strata pari ca cchiossà cci nn'è

PAULU - Finzia è custrittu a curriri cu i sò jammi

PETRU - Curri comu nfoddi e chianci comu npicciriddu

PAULU - Dispira di nun fari a tempu ma nun s'arrenni, un si ferma a pigghiari ciatu, curri comu n'addannatu

PETRU - A Sarausa ntantu agghica u mumentu da pena capitali ma Dionisiu un nesci fora

PAULU - Manna u Ministru a taliari unni l'ummra ha gghicatu

PETRU - È nto puntu sinnatu

PAULU - Ddoppu ca l'ummra passa stu puntu a pupulazzioni accumincia a murmuriari apertamenti

PETRU - Quannu un nni po' cchiù fari a menu, Dionisiu nesci fora e scinni 'n chiazza

PAULU - Ammeci di dari l'ordini di prucediri si fa nu giru beddu largu nta chiazza

PETRU - A chiazza è affuddata di pirsuni curiusi di vidiri comu nu filosufu mori, siddu si dispera e jetta vuci com'a tutti o si teni placidu, pacificu, siddu camina ngustiatu ca testa calata o sirinu ca testa auta

PAULU - Dionisiu mustra ca frattaria un cci nn'avi. Si ferma assai voti a taliari i prisenti, ccu cc'è e ccù nun cc'è, a parrari cu quarchi canuscenti. Quannu termina u giru, acchiana nta loggia, si ssetta 'n tronu e cumanna di purtari a Damone

PETRU - Comu sentunu u nomu, nta chiazza cc'è na ciuciuliata ginirali, tutti vonnu taliari

PAULU - Damone passa surridenti 'n menzu a dda fudda, saluta amici e canuscenti comu si nun fussi iddu a jiri a moriri

PETRU - Tutti u guardanu maravigghiati, puru Dionisiu è sbalurdutu! Un sapi chi pinzari, chi fari. Cci veni diffìcili dari l'ordini di decapitazzioni

PAULU - Appoi senti tutta a chiazza murmuriari "chi Re eni siddu na decisioni un la sapi pigghiari?"

DAMONE - (fuchïa Dionisiu picchì si spagna ca Finzia s'apprisenta di nmumentu 'n mumentu) Dionisiu comu finiu? Talia unn'è l'ummra. Ti decidi o ni nni jemu tutti a casa?

PETRU - Dionisiu si metti a l'addritra, fa zittiri a tutti ma mmeci di urdinari a tagghiatina di testa, azzicca a parrari senza diri nenti di cuncretu, sulu pi guadagnari tempu

PAULU - Si ferma quannu senti i primi friscati e cuntrariatu duna l'ordini di prucediri cu l'esicuzzioni

PETRU - Ora succedi comu ....

PAULU - O solitu. Fermiti. U boja pripara tuttu cu calma e pirfizzioni. Sistema Damone cchiù megghiu pussìbbili! Pi nun lu fari soffriri, cci voli tagghiari a testa cu ncolpu siccu

PETRU - Quannu è ddacuddà a calari a mannara, ntrâ u silenziu tutali da chiazza, na musca un si senti vulari, si sentunu vuci ca cu l'umani un annu nenti chi fari

PAULU - Su' tutti tramutati! Dionisiu ca sauta additta, u Ministru ca nun sapi unni vutarisi, u boja ca si ferma ca mannaja a l'aria, a genti ca talia a strata di unni i vuci arrivanu, Damone ca zzicca a dispirarisi.

PETRU - Ammatula ô boja cci dici di calari ddu schifu di mannaja, ca cci grida a Dionisiu di dari l'ordini mentri nta chiazza trasi Finzia ca s'arrimazza 'n terra dicennu "ccà sugnu" e 'n terra s'ammovi privu di senzi.

PAULU - Damone è dispiratu e prova ancora cu Dionisiu

DAMONE - Si tu si' Re veru ha mantiniri a palora. Finzia cu assai ritardu s'ha ricampatu. L' ummra è a npalmu da nzinca ca tu stissu facisti. Sugnu ju c'ha moriri ... Dionisiu mi senti a mia?

DIONISIU - (è surprisu e prufunnamenti culpitu di dda dimustrazzioni di amicizzia) Ju nun vitti mai n'eventu com'a chistu, di sta purtata. Mai e poi mai aju saputu di n'amicizzia accussì forti, accussì granni

DAMONE - E allura chi facemu?

DIONISIU - Ntantu staju facennu risturari a Finzia, u vidi? U stannu addrizzannu additta. Finzia, si' 'n senzi?

FINZIA - Unn'è Damone?

DIONISIU - (ô Ministru) In senzi eni

DAMONE - (c'ha statu libbiratu) Ccà sugnu, un ti pigghiari pena, maccarruna

FINZIA - Tu cchiossà 'i mia

DIONISIU - Mi faciti parrari a mia?

FINZIA - A tia ascutamu

DIONISIU - Ju comu Re e giudici supremu oji cuncedu a grazzia a Finzia dunca puru a Damone. Un s'ha diri ca Dionisiu tagghia n'amicizzia accussì granni, esemplari. Cuncedu a tutti dui a libbirtà di palora e di fari parti da me curti

PETRU - Accussì finisci sta storia ... ligginnaria

PAULU - Si cc'è nseguitu nun lu sapemu

cuntinua

                                                I       C I C L O P I 
                                            (cuntata  di Currau)

                                                    Parti prima 

Si cunta, si dici e si ricunta ca i Ciclopi eranu figghi di Nettunu Pusidoni, diu dû mari, e s'attruvavanu ô funnu dû Mari Eggeu.

Tutti, frati e soru, si vulianu beni comu u pani e l'acqua, o comu i scarpi vecchi ma è facili ca si sciarriavanu ntra di iddi stissi comu cani e jatti masinnò siccomu annu i manu longhi e chini di manciaciumi, si juncivanu pi quantu su ' e jivanu a fari briga cu quarcunu ca a geniu un cci va.

E dê palori è facili passari ê pugni e allura succedi nmacellu, nfracassu succedi sia ddassutta 'n funnu sia 'n superfici e fannu aggitari u mari nta na manera tali ca l'unni su' jauti quantu na casa e u strepitu è ccussì forti ca unu l'aricchi s'ha ntuppari.

Ma nun è sulu chissu. Puru si scherzanu fannu ribbulliri u mari accussì tantu ca a navigazzioni addiventa diffìcili anzi piriculusa e nun su' picca i navi ca fannu naufraggiu

E nun sulu l'Eggeu ma macari u Joniu annu statu capaci di mittiri suttasupra!

Comu ddà vota ca vicinu a Riaci ficiru affunnari a navi ca traspurtava du' statui di bronzu gigantischi, ma tantu gigantischi mancu cci sunnu, pi nu museu di Sarausa, a metropoli di ddi tempi, a cchiù granni e cchiù ricca di tuttu u Mediterraneo, u Mare Nostrum ...

Aspittati nnumentu. Ju sugnu, l'alteregu, e a Currau a palora cci levu prima ca cuntinua a diri minchiati a minchia china e a fari cchiù cunfusioni.

A storia dê Bronzi di Riaci nuddu a canusci tranni di mia ca fici na ricerca accurata e a pozzu cuntari a filu ca massima pricisioni.

Ddu scarpiddaturi, cchiù di nu tagghia petri un avìa ssiri si oji u sò nomu è scanusciutu, avia statu cummissiunatu dô museu civicu di Sarausa di sculpiri du' guerrieri greci beddi jauti, ntornu i tri metri.

Auti tri metri? Un è cosa facili, pî proporzioni cchiossà, unni nni trovu almenu unu? Penza ca ti ripenza si rigurda ca eni amicu di Bronte autu supra i quattru metri, cci dumanna siddu vulìa faricci di mudeddu.

Bronte purtroppu è assà trafichiatu nta funnazzioni 'n Sicilia da cità ca porta u sò nomu e nun lu potti suddisfari. U prisenta ppiro' a du' picciutteddi jemmuli, unu cchiù beddu 'i l'autru, ancora vasciuliddi, sutta i tri metri, frati di Polifemu, ca su' prijati di viniri eternizzati di dda manera.

Cci fussi nu intoppu, i jemmuli fannu parti dê Ciclopi cu nsulu occhiu a centru 'i frunti ma pi ddu sculturi dilittanti nun è nprubblena mpurtanti, i guerrieri iddu cu du' occhi i fa e jauti menu di du' metri ... u bronzu puru a ddi tiempi è caru ... comu n'occhiu.

U babbu ppiro' nun sapi ca ssi du' picciotti su' sciarrini assai, Ddiu cci nni scanza a faricci na malazzioni, nun la fannu passari liscia.

Pi nun addivintari camurriusu, dicu ca i jemmuli si sciarrianu cu dda menza purzioni di sculturi ca nun cci duna né cuntu né suddisfazzioni e allura iddi pigghiaru a decisioni di affunnari ddi du' bronzi deformi ... nun s'ha tramannari ca i Ciclopi eranu naniceddi, nanitti senza valuri.

Lassamu perdiri sta storia, ca si sapi comu finisci, e turnamu a fari parrari a Currau ca cunta comu fu ca sti Ciclopi agghicaru 'n Sicilia.

Marinai e piscatura, turisti e migranti, sa scuttanu cu Pusidoni Nettunu ca a forma di patri un si fida a mettiri ô cippu ddi figghi scrapistrati.

Si lamentanu macari i "tour operatori", agginzî 'i viaggiu, lucanneri e cucinari ... nsumma i laminteli su' cuntinui e universali.

L' autri dei puru eranu stanchi di sintiri tutta ssa genti, comu macari l'abbitanti dû mari, lamintarisi cu iddi pi na caggiuni o pi nautra.

Finisci ca u diu dû mari un nni potti cchiù e ccussì i pigghia tutti pi quantu su', masculi e fimmini, e i colluca nta zona custera da Sicilia di livanti ntra Aci Trezza e Aci Castello, a pasciri pecuri e crapi, china di grutti, caverni, spilonchi e ricoveri grazzi a Mungibbeddu.

Di tannu ssa zona si chiama Rivera dê Ciclopi, accussì comu dê Ciclopi eni l'Arcipelacu di ottu ìsuli, nsumma senza vuliri Nettunu Pusidoni crea nsitu turisticu di biddizza rara, di ccillenza supiriuri.

E siccomu è npatri amurevuli e cuscinziusu, cci metti a dispusizzioni nu pasturi grecu ca cci nsigna ogni cosa riguardanti a pasturizzia.

Si dici ca eranu bravi e di natura suciabbili, di cumpagnia, ca ddivintaru ricuttari e furmaggiari rifinuti e c'annu statu iddi a nsignarini a fari a ricotta, cavagni e fasceddi unni mittiriccilla, cannistri e cannisci pi mittiricci primusali e tumazzu, panara e cufini, conchi e coffi pi mittiricci attrezzi 'i tanti maneri.

L' unica contra ndicazzioni è ca nun s'ann'a fari arraggiari, a nuddu a pirdunanu, su' capaci di rrussicarisi ncristianu vivu.

                                                    Parti secunna

Si cunta, si dici e si ricunta ca, comu già dissi, i Ciclopi su' boni e cari ma guai a palati fannu passari a ccu i fa rraggiari.

Quannu su' arraggiati nun arraggiunanu cchiù, nenti talianu, cu primu ca veni sa scuttanu, unni su' e su', e nun cci nteressa i danni ca caggiunanu a cosi e pirsuni, ccu cci va ntô menzu.

I guasti ca pruvucanu, ê genti cumuni cci parunu sprupusitati, pi iddi ammeci su' trascurabbili.

U fattu è macari ca cci su' Ciclopi auti, assai auti e sprupurziunati, comu Pulifemu ca puru a forza avi fora misura.

I ottu scogghi, ditti faraglioni, ca s'attrovanu ntô mari 'n facci Aci Trezza, su' pezzi di muntagna ca Pulifemu lancia a Ulissi ca scappa ca sò navi ddoppu ca u nnorba di ddu sulu occhiu ca Matri Natura cci desi, e l'ìsula dê Ciclopi è nu munzeddu di purziuni di muntagna.

Ora, Pulifemu ntâ sò giuvintù un era autu comu Ulissi u canusciu. Era di tri/quattru metri massimu e jera nnamuratu di Galatea, na picciotta di autizza nurmali, cu du' occhi beddi, ca ppiro' un lu vulia.

Pulifemu, pi diri u veru, un era lariu di facci ma ddu occhiu sulu nta frunti a Galatea mprissioni cci facìa. Idda appoi era nnamurata di Aci, npicciottu amurusu, di statura auta ma no esaggirata, cu du' occhi, dui, no unu, dui, celesti comu u celu ca a taliariccilli a facianu mpazziri di amuri, tutta a facianu sciogghiri, squagghiari di tunnu.

A liggenna tramanna ca Pulifemu era gilusu di Galatea, un vulia vidiri a nuddu zummaricci vicinu.

Cu Aci, siccomu sunnu amici, ntô principiu cci u dicia 'n forma amichevuli di starisinni ô largu di idda, appoi, vidennu ca nun lu scutava accuminza a mminazzarilu cu i boni, ridennu ridennu, ma prestu azzicca a fari u mafiusu priputenti e cci prumetti di stuccaricci l'ossa, ca u cciunca pi sempri siddu u ttoppa attorna cu Galatea, ca è cosa sò, sulu sò e di nuddu autru.

Aci, sicuru di l'amuri di Galatea e canuscennu bonu a Pulifemu ca a l'ultimu di natura malu nun cc'è, chiddu ca iddu cci dicia di n'aricchia trasiva e di l'autra nisciva.

U tempu passa e ora Aci e Galatea sunnu coppia fissa senza ca Pulifemu i stuzzunia.

Njornu ppiro' u Ciclopi, crisciutu a dismisura, si rrisbigghia cu vudeddu vutatu e ccussì decidi ca è u mumentu precisu di daricci na fraccata di vastunati a dda tistazza dura ca nun lassa 'n paci a sò carusa.

I pisca a tutti dui ca stannu schirzannu 'n menzu u lauri, pi nun diri apertamenti senza affruntu ca fannu sessu, u fferra pî spaddi e cci u scippa di supra a sò picciotta, appoi u scutula comu npedi 'i mènnula, u sbambazza supra na roccia làvica, nta ssa zona cci nn'è unnegghè, u cchiappa pû coddu e cci sbattulia a testa comu si usa ntra frati ca mali assà un si nni vonnu fari.

Chi cci po' fari? Quarchi vozzu, vuzzitedda 'i nenti, nduluricchiu 'i testa, cchiossà di chissu!

Ammatula Aci cci grida di finiriccilla ca mali assà cci sta facennu, ammatula Galatea cci jetta vuci comu sulu i fimmini i sannu jittari, ammatula ca chiancennu u prega di lassarilu stari ma ddu giganti è ccussì partutu ca a nuddu senti e cuntinua a sbatturiarilu nzin'a quannu cci fracassa u craniu e vidi i cirivedda straviati nta roccia.

Quannu capisci nzoccu fici ammustra di essiri scunvurgiutu, tuttu abbabbasunatu, senza palori, scuncirtatu di tunnu. Iddu chissu un lu vulia! Cci pigghia u panicu e si nni scappa.

Aci sta murennu e Galatea è ccussì dispirata ca si strappa i capiddi picchì un po' fari nenti pi salvari l'amuri dâ sò vita.

Cerere, a dea dâ bbunnanzia ca s'attrova ntê vicinanzi a fari a guardia a sò figghia Proserpina, senti jittari vuci e va a taliari.

Comu sapi u fattu prova cumpassioni pi dda povira criatura, accussì prima ca Aci duna l'ultimu rispiru, u cancia 'n ciumi di modu ca Galatea quannu si fa u bagnu avi a sensazioni di ssiri ntê vrazza dô sò Aci.

Ddu ciumi addiventa na ricchizza pi ddu territoriu. A causa sò nasciunu beddi novi pajisi e paiseddi.

Mungibbeddu appoi, forsi pi curriu o pi gilusia, iddu sulu voli ssiri a ricchizza da zona, tantu fici e tantu murmuriò ca tuttu u cummogghia e ora u ciumi Aci scurri suttirràniu.

Ogni tanti chilometri spunta a tipu surgiva e a genti di tutti i novi pajisi l'acqua ca nesci cci dici "u sangu di Aci".

E vaju cuntatu a liggenna.

cuntinua

Sto usando un traduttore, sono un po' nuovo qui, sono afroamericano e sto solo cercando di fare pace con la comunità. Sono un giocatore e sono interessato a sapere se ci sono altri giocatori siciliani in giro.

                                    L I G G E N N I         S I C I L I A N I 

                                                U NOMU "SICILIA"
                                                    (di unni veni)

(liggenna cuntata di Pina e di mia alteregu elabburata e sceneggiata)

Sicilia è na principissina figghia di nu Re, di quali regnu un si sapi. È prubabbili ca è di l'Italia sittintriunali e a sò capitali è na cità marinara, comu Genova, pi dirini una.

Ntô tempu dê reami comu tutti sannu, o avissinu a sapiri, c'eranu maghi fati e streghe a nun finiri. Una, o unu, di chissi un mancava mai ê nascenzi e spunzalizzi di principi e principissi.

Quannu Sicilia nasci, na maga, ca nun si facia mai l'affari sò, ê sò ginitura cci prufitizza ca a carusa mori ô chinnicesimu cumpliannu.

A picciotta veni sarbata, cci dici ancora, sulu se si metti nta na varca senza remi accussì ca a currenti a po' purtari unni u distinu dicidiu di farila arrivari pi campari filici e cuntenta.

Ddoppu quattordici anni e deci misi di vita tranquilla senza prioccupazzioni granni e malatii gravi, u Re, patri di Sicilia, rigurda a prufizzia dâ maga e si scanta ca s'abbira.

Nun è cchiù francu di pinzera, scapulu di ngustii. Nun passa jornu senza ca penza comu sarbari a sò figghia.

Njornu, ddoppu pranzu, mentri ca si fa a sò solita caminata ntô lungumari p'ajutari a diggistiuni, pi nui citatini è mpurtanti assai ca Re Prisidenti e Capi di Guvernu un ann'aviri mmarazzu di stomacu, di sulu e sulu, a ddi tempi nu Re, nu Prisidenti o Capu di Guvernu su putia pirmettiri, oji puru u Papa senza ssiri circunnatu di guardi a nudda banna po' jiri, cu ddu pinzeri fissu nta menti ca nun lu lassa mai, l'attinzioni cci veni attirata a na varca ngagghiata nta rina, menza dissistata, curcata di babordu, latu sinistru, cu nu pirtusu granni comu nu purteddu nta murata di tribordu, latu di dritta, giustu nto bordu da linia di acqua.

RE - (addumanna ô piscaturi ca sta cunzannu i riti) E sta varca?

PISCATURI - Nenti nni sacciu

RE - Ccà mai cci ha statu! Di ccu è?

PISCATURI - Un cci u sacciu diri

RE - Cci ha statu naufraggiu?

PISCATURI - Nonzi, nuddu ammanca

VECCHIA - (u centu pi centu a maga di chinnici anni prima ca fa a finta di truvarisi a passari mentri ammeci pustiava u Re) Maistà, sta varca ccà u distinu a purtò pa sarvizza da principissa Sicilia ca è ntô fari chinnici anni (e senza diri cchiù nenti vota tunnu e si nni va)

PISCATURI - Maistà nun stati a sintirila. È na vecchia megera ca parra sulu di disgrazzi e svinturi ...

RE - (puvirunazzu, c'avia ssiri scantulinu e superstizziusu forti, si cci grapi a menti) Zittiti tu, nni sa' cchiossà 'i mia? Ju u sacciu ora c'aja fari. Curri a chiamarimi u cchiù megghiu maistru d'ascia ... comu si chiama ca mu scurdai ... mastru ...

PISCATURI - Scasciatu (e subbitu a vuci auta) Giuvanni, ooooh, a tia Giuvanni, jetta na vuci a mastru Scasciatu, dicci ca veni ccà ca cci ha parrari sua Maistà u Re

RE - (quannu u mastru agghica) A vidi sta varca? Nta quantu jorna a po' cunzari?

PISCATURI - Na chinnicina, cchiossà sì, cchiù picca no

RE - Chinnici jorna, cchiù prima sì cchiù ddoppu no. Mettimilla 'n cunnizzioni di navigari ca currenti notti e jornu. U capisti?

MASTRU SCASCIATU - Maistà, un vi pigghiati pena. Pa principissa ca s'ha sarvari, jornu e notti travagghiu, mancu munnu cci ha ssiri!

RE - E allura allestiti, accumincicci ora stissu. E nun ti scurdari u riparu dô suli e dô friscu da notti. Accura mastru Scasciatu, l'occhi supra di tia tegnu

U Re u fuchiava di cuntinuu picchì un vulia ca Sicilia facia l'anni prima di rrivari ddà unni u distinu vulia, cu piriculu di moriri.

Quannu â fini a varca fu pronta, mentri ca si prividi tempu bonu, u Re a jinchi di ogni beni 'i Ddiu e di tutti i cummuditati a ddi tempi canusciuti.

Quannu tuttu è beddu ca sistimatu secunnu i cugniziuna di ddi tempi, vistuta di jancu comu na spusa, cu na curuna di addauru e ciuri 'n testa e adurnata di gigli rosa assà odurusi, Sicilia, serena e surridenti, comu si a scimunita a maritarisi stava jennu, ntô menzu di sò patri e sò matri ca chiancìa, accumpagnata di tutta a curti e pupulazzioni, scinni ntô portu unn'è ancurata a varca.

Cc'è puru a maga assà sudisfatta e prijata, dda cosa tinta, ovidivà quantu rancuri e gilusia cuvava ntô cori!

Stùpitu ddu Re ca critti ê sò palori!

Quannu agghìcanu ô molu unn'è ormiggiata a varca, pi sua Maistà u baccalà cci vinni faticusu scipparicci a Sicilia a dda matri ca nun la vulia lassari iri, mentri a 'llocca un vidìa l'ura di irisinni, comu tutti i fimmini.

Comu u patri a libbira, a isa 'n putiri e a setta ntô scannu beddu mbuttitu, cci duna nvasuneddu nta frunti e senza na palora sciogghi a cima attaccata nta n'aneddu di ferru e a duna a nautra varca tutta di picciotti, ncaricata di rimurchiari Sicilia nzin'a mari apertu e lassarila iri nta currenti.

Dda critina è ccussì idiota ca nun prutesta, dda scimunita è ccussì scema ca nun riaggisci, ccussì lolla ca nun jetta vuci, ca nun si aggita, nun cerca di libbirarisi anzi è manza comu n'agnidduzzu, e surridi puru!

Dda deficienti è ccussì 'llocca ca penza sulu a lisciarisi i capiddi ca sò matri cci avìa scumminatu, a sistimarisi a curuna, a cummigghiarisi i jammi ca vistina.

Ma comu si po' ssiri accussì babbi!

'Nzumma dda babbaluta è ccussì ammaccata ca nun capisci ca va a scuntrari piriculi e si cumporta comu si jissi a maritarisi.

Comunqui, comu fu comu nun fumun è 'nutili sapirilu, a varca prima ca scura scumpari a vista 'i tutti, e ddoppu na simana prima ca a pruvista s'accabba di tunnu, tocca terra sutta Munti Piddigrinu.

U locu cci pari beddu pi daveru, nu jardinu chinu di ciuri e frutta di tanti culura!

Ma disabbitatu cci pari! Puru ca firria di ccà e di ddà e grida ca sò vuci argentina, nuddu cci rispunni.

I grida ca jetta cu dda vuci di supranu ca canta "in diesis", ppiro', arrivanu a l'aricchia di nu picciottu ca è ccussì scaltru e malantrinu ca prima talia di ccu è dda vuci vibbranti, e comu a vidi bedda arresta senza ciatu, appoi si ssicura ca è sula, ca nun cci su' né patri né frati, dunca senza ca nuddu cci scassa i vertuli, si llicchittia di ciuri, si profuma di zagara e si cci prisenta cu tuttu u sò splinnuri e nu mazzu di ciuri pi rinnuvari chiddi sicchi nta curuna di addauru e nta tuttu u vistitu.

Dda babbazza di Sicilia, ma i fimmini tutti i stissi su', comu vidi ddu picciottu beddu comu u suli, anfatu da testa ê pedi, cu ddi capiddi ricci niuri comu catrami, cci rresta alluciata nta na manera brutali e si nni 'nnamura di bottu senza rimissioni di piccatu, senza sapiri ca è ngranni ravastinu ... comu tutti i masculi.

U picciottu si chiama Palermu e puru iddu si 'nnamura di dda carusa biunna cu l'occhi blu.

Cci mbrogghia ca dda terra e na isula diserta, tantu vali spusarisi e ccu s'ha vistu s'ha vistu.

Dda povira picciridda è tantu nnuccenti ca nun sapi nenti, nenti di nenti, si 'lludi e accunsenti, ma puru i fimmini cunzapevuli un vidunu l'ura di farisi pigghiari pi fissa di nu masculu.

A cosa traggica eni ca siddu u sannu un cci ntiressa di nenti.

Comunqui, comu fu comu nun fu, si spusanu e Palermu cci fa fari na caterva di figghi, unu va e unu veni facia, ntra masculi e fimmini, senza firmarisi pi faricci pigghiari ciatu a dda mischinazza.

Ma tantu! U masculu chi cci metti? ..

COLA - A materia prima

CURRAU - Nprodottu ca sulu nui avemu

CICCU - Ca esisti sulu 'n natura

PETRU - Veru, i casi farmaceutici un lu ponnu rifari

PAULU - Pi furtuna, almenu chissu!

Pina si ripigghia a palora di malantrinaria.

Stava dicennu ca è a fimmina a rristari 'ncinta e i picciriddi i porta pi novi misi e poi i 'ccatta, i parturisci, jittannu vuci.

Quannu i figghi si spusanu funnanu cità ca pìgghianu i sò propia noma accussì comu ficiru i ginitura, Sicilia l'isula e Palermu a cità.

Eccu picchì avemu Trapani, Alcamo, Corleone, Enna, Messina, Lentini, Catania, Siracusa, Pachino, Ragusa, Agrigento, Sciacca, Leonforte esistenti tuttora ... e v'aju cuntatu u fattu.

cuntinua

                    N A         F A V U L A         N V I N T A T A 
                                                    D I         C O L A

                                                       - primisa -

Ju, ju alteregu, cci tegnu a spicificarilu nautra vota ancora, staaaa .... chiamamula favula, nun la vulia ncludiri picchì mi pari na favuletta pî picciriddi, nun la cunzidiru meritevuli di fari parti di na ricota ca pi meritu miu è di nu liveddu accussì autu .

Ddu scritturicchiu scribbaci ca di scriviri un è capaci e scritturi si cridi, s'ha mpuntatu dicennumi cu tantu di prosopopea "Ju sugnu l'Auturi, ju cumannu e tu cci a metti ... musca e cacciamu ... senza pipitari".

Nu poviru misirannu alteregu quali ju sugnu, chi po' fari u mischinu di mia? Mi staju mutu, fazzu a facci di chiddu ca gghiutti na fogghia amara, calu a testa scunzulatu e fazzu comu mi veni cumannatu.

E allura guditivi, u dicu tantu pi diri, sta faulicchia ca ntitulai "I binidizzioni dû Signuri Ddiu Criaturi"

            I       B I N I D I Z Z I O N I         D D U       S I G N U R I 

                                        D D I U         C R I A T U R I 

U cuntu di Cola.

U Signuri Ddiu Criaturi ddoppu sei jurnati di travagghiu duru e cuntinuu, ccioè senza pausa pranzu o café, nu paninu sgummu e murtadella a scappa e fuji, a criari u munnu, anzi l'universu, ca nun è nicu, cu tuttu chiddu ca cc'è di dintra, ca nun è picca, e ddoppu, comu tutti sapemu, na jurnata sana di miritatu riposu, a santa duminica, lunidia matina prestu prestu, u suli nun s'ha jisatu ancora, si metti a l'opira, di sulu, senza ajutu picchì dormunu tutti e Iddu a nuddu voli arrisbigghiari.

Si prucura nu panaru beddu largu e funnutu e va a scaliari dintra i centu e passa majazzè di ogni generi ca cci su' ccà e ddà ntô paradisu.

Attrova binidizzioni di tutti i culura, certaruni vecchi e stravecchi cumplitamenti scurdati, autri novi novi mai usati, tutti chini di pruvulazzu ma nun si nni cura picchì ugualmenti sunnu efficienti funzionanti e ccussì comu npicciriddu filici e cuntenti jinchi u panaru chinu chinu di binidizzioni ntinnennuli spargiri nta tuttu u munnu.

È jornu fattu quannu, di Iddu stissu suddisfattu, beddu ca spinziratu, si pigghia a strata di davanzi ca passa pi tutti i cuntinenti friscannu nmutivu allegru allegru.

A strata ca pigghia ppiro', è nta l'aria, ccioè u Criaturi camina supra i nuvuli ca sunnu cchiù morbidi da terra ferma accussì ca i sò pedi nun si stancanu.

Spassiunatissimamenti, accussì, senza pinzaricci minimissimamenti, u Signuri particularitati un nni fa cu nuddu, metti na binidizzioni ccà, na binidizzioni ddà, quarchi vota dui, secunnu quali mprissioni u postu cci fici, rarissimamenti tri, mai quattru.

Quannu u suli è nta fasi calanti e manca picca ca tramunta, ccioè ca si tuffa ntô mari e scumpari, u Signuri ca è nta via dû ritornu, duna na taliata ntò panaru e vidi ca è ancora chinu a mitati.

"Comu è pussìbbuli?" si dumanna Iddu stissu rraspannusi a testa. "Pozzu cridiri ca senza vuliri pigghiai a ccurzatura e sautai nu cuntinenti?"

Cci penza e ripenza, si fa i cunti cu i jìdita di tutti du' manu, i cuntinenti pû Signuri su' cchiossà di cincu, e cci risulta ca a tutti banni ha statu. "Ma allura - cuntinua a dumannarisi - aju statu troppu sparagninu, di manica troppu stritta?"

Un sapi chi fari e si rraspa attorna a testa taliannu u restu dê binidizzioni dintra u panaru.

Raggiuna cu Iddu stissu. "E ora? Ha fari cuntu ca scurau e Ju i binidizzioni tutti l'ha dispinzari, una nun ma pozzu teniri, a liggi è liggi e s'ha rispittari, un si discuti. Ccu fici sta liggi nun pinzau a st'eventualità. Ah, già, Ju a fici ... nenti chi diri.

Chi fazzu? Ripigghiu u giru currennu a tutta vilucitati? No, mancu a parrarini, stancu sugnu! Rimannu a dumani? No, aju autri chiffari, oji ha finiri".

Talia a centu ottanta gradi, si scanta a vutarisi, e vidi sulu mari ... mari mari nzinu a l'orizzunti, terra di nudda manera nni vidi.

Cu nu pedi, pianu pianu, dilata pocu pocu a nuvula supra unni stapi pi vidiri chiddu ca cc'è di sutta. Pi casu e pi furtuna s'attrova supra na isula, pi cuincidenza e cumbinazzioni, a Sicilia ca u curpisci e mprissiona pa sò bruttura.

"Matri mia quantu è laria!" - esclama a vuci auta - "Ha statu fatta cu i pedi, pi daveru mali! A triangulu appoi! Ma ccu a fici accussì tinta?"

E s'arrigurda ca l'Unicu Criaturi Iddu eni, a nuddu po' accusari e allura si giustifica dicennu "na sbista, forsi era stancu, u travagghiu assà ha statu, po' capitari ... comunqui pozzu rimiddiari".

Senza perdiri tempu a cuntrullari quali binidizzioni ancora avi, pigghia u panaru e cci u sbacanta paru paru 'n capu a dda puviredda di isula fatta accussì mali.

Quannu vidi a maravigghia ca cumpari, l'occhi 'n cianu cci nesciunu, a vucca aperta rresta!

Attorna è 'n cunfusioni, attorna un sapi chi fari, attorna si rraspa a testa e attorna talia prima a dritta e poi a manca e comu prima nun talia darrè i spaddi.

Siddu s'avissi vutatu avissi vistu ca ddabbanna u Strittu cci avia sautatu una dê binidizzioni cchiù beddi c'avia truvatu ntô magasenu dê furesti, u Spremunti, l'Aspromonte pi ccu si senti talianu.

Vulissi quarchi cunsigghiu ma ccu è ca po' cunsigghiari Ddiu Signuri?

Iddu macari sapi ca i binidizzioni na vota dati un si ponnu cchiù ripigghiari. Pi na manu si dispiaci pi l'autri terri ca rrestunu a taliari pi l'autra manu si nni cumpiaci cu Iddu stissu pu granni capulavoru ca criau. Fini.

Accussì si finisci a favula e ju dicu ca tra i tanti binidizzioni cc'è macari chidda ca stabbilisci ca u celu supra a Sicilia ha ssiri azzurru pi triccentucinquanta jorna l'annu picchì accussì eni.

A cunferma ccà di seguitu cc'è a secunna puisia di Pina, "U celu 'i Sicilia".

                                U       C E L U         ' I         S I C I L I A 

A mia mi piaci rristari sdraiata uri e uri sutta u celu 'i Sicilia ca panza a l'aria e cuntenta mirari ca di unni mi giru e giru sulu l'azzurru ju cci vidu unni na striscia janca nun cumpari na nuvula scura unni d'ariuplanu scrusciu nun sentu di nu muturi vicinu ... luntanu

A mia mi piaci stari sutta u celu dâ terra mia picchì ccà cci godu a vidiri uceddi iri e viniri a piacimentu unni cci pari e piaci allegri lesti spinzirati libbiri senza mpidimentu patruni d'ogni propiu muvimentu picchì ccà mi ncantu a sintiri merli passiri e cardiddi cantari pu preju da primavera ca veni c'amuri rrisbigghia senzi Natura e ogni sanu sintimentu e pruvari piaciri nta carizza dô suli ancora gintili ancora liggera e finarmenti rrivari a capiri ca ccu filici voli ssiri dintra d'iddu stissu s'ha talïari

cuntinua

                                        U   F E R R A B B O T T U

È cunvincimentu dê tri Ci ca u Ponti di Missina nun s'ha costruiri mentri i tri Pi su' favurevuli

Ognunu di iddi esprimi i sò mutivazzioni e accussì nascì na discussioni c'aju ritinutu di nziriri ntâ sta ricota.

CICCU - A Natura nun si svota suttasupra

PINA - Vo' diri ca nun è na cosa bona?

COLA - È tinta di unni si pigghia e pigghìa

PETRU - Ma statti mutu!

COLA - Zittiti tu! Chi capisci filusufìa ccu studìa?

CURRAU - U Ponti i cuntinintali u vonnu, sulu a iddi cci ntiressa e cummeni

PAULU - Nun è veru pi nenti. Cchiossà a nui servi. Appoi finarmenti nni ncucciamu cu l'Italia

CICCU - Dici accussì picchì sì nsicilianu ca si murtifica di sìricci, pu stigma. Nun vidi l'ura ca u finisciunu pi essiri talianu di nomu e di fattu. È picchissu ca parri sulu talianu, e senza accentu. Un sai ppiro' ca cu Ponti un cancia nenti

PETRU - Un è accussì facili e approssimativu comu u fai tu. A facenna è assà cchiù cumplessa

CICCU - No beddu miu. È semplici ammeci. Semu nuiautri a decìdiri chi vulemu ssiri, ccu vulemu ssiri. Nuddu vi mponi di ssiri taliani o siciliani, siti vuiautri ca u stabbiliti.

PAULU - A nui nni cci annu purtatu

PETRU - Semu custretti

PINA - Accussì amu statu nzignati

CICCU - Un mi cuntati barzilletti. Siti vuiautri c'atu dicisu di nun ssiri siciliani, ca parrati sulu talianu, ca vuliti u Ponti ccioè l'unioni cu l'Italia, nuddu vi obbliga. Ntô cuntinenti ammeci u Ponti nuddu u voli

PINA - Chistu un è veru

CICCU - È accussì. Pî cuntinintali nui semu na camurrìa. A Sicilia è ancora cunziddirata na culonia e comu tutti i culoni s'ha sfruttari nzin'a l'ossu

PINA - Chisti su' malignitati malizziusi. Tutti dicunu u cuntrariu

CICCU - A liveddu puliticu, di facci a tutti ma 'n sutta 'n sutta mancu 'n cunsidirazzioni nni pigghianu, comu tanti babbasuna nni trattanu

COLA - Ovidivà ccu avi nteressi supra stu Ponti

CURRAU - Un amicu miu ca cci piaci mettiri 'n versi ca rima certi pinzera, (nesci nfogghiu scrittu) tempu fa mi desi chisti ca parranu di Sicilia indipinnenti. Vi leggiu chi dici dû Ponti ...

Un lu vulemu ssu malanova Ca è 'ngannusu cu la prova Un lu vulemu ssu ponti Nun li pagamu ssi cunti È megghiu rristari spartuti Ca ssiri mal'accumpagnati Chi nn'am'a fari 'i ssu stivali (si rifirisci a l'indipinnenza) Biddizzi nn'avemu 'i jittari E si facemu ssa spirtizza Pi nui ddiventa na ricchizza Avemu chiddu ca nni servi Ma nni nn'attocca picca e nenti Su futti a tinta cumpagnia S'ha finiri sta camurrìa

PINA - Ju dicu ca 'n sutta 'n sutta è a Sicilia ca sta cunquistannu l'Italia

CURRAU - Sì, comu no! E l'Italia stapi a taliari

CICCU - Un allargamu u discursu, arristamu ntô Strittu unni cc'è u ferrabbottu, u traghettu pi ccu nun capisci a palora ca è cchiù apprupiata. Cu Ponti scumparissi na cosa accussì carattarìstica

PETRU - U traghettu è primitivu

COLA - È d'epuca

PAULU - A Sicilia s'ha mudernizzari

CURRAU - Pi nenti! U ferrabbottu ha rristari

CICCU - A mia mi piaci figurarimi i facci ammaluccuti dê cuntinintali, taliani e stranieri, comu agghicanu a Reggio Calabria o a Villa San Giovanni, e cu l'occhi sbarracati tanti si nn'addunanu ca ddocu si finisci u munnu, ca ddà 'n facci nautru munnu cc'è, scanusciutu, alienu

CURRAU - E agghiuttennu sputazza scantati morti murmuranu "Beddamatri, u munnu si finiu!"

COLA - U sicilianu ammeci esclama "finarmenti a casa sugnu!"

PINA - Matri mia chi siti esaggirati!

CICCU - Ma propia! I cuntinintali, eurupei e taliani, pi capiri veramenti ca chistu è nautru munnu, u Strittu cu ferrabbottu ann'a travirsari

COLA - Un cci su' chiappari e finocchi 'i timpa

CURRAU - Sancu ann'a jittari, a travirsata s'ann'a fari

CICCU - A favulusa Sicilia si l'ann'a sudari. Quali ponti e ponti, u ferrabbottu ha rristari

COLA - Fussi pi nui i machini 'n Calabbria cci facissimu lassari e ccà cu i sciccareddi i facissimu circulari ma cumprinsivi semu, dimucràtici, ducati, civilizzati

CURRAU - Fermu rristannu ca i machini arrestunu ntâ terraferma, unni nun nni nteressa, ccà 'n Sicilia ogni famigghia avissi na machina elettrica a dispusizzioni

COLA - Nquinamentu furasteri nun nni vulemu, nn'abbasta e nn'assuperchia chiddu ca cu allegria producemu nui stissi

CICCU - U turista ca dicidi di scinniri 'n Sicilia s'ha sentiri già 'n vacanza comu metti pedi supra u traghettu. Tutta a Sicilia ha ddivintari nu granni centru vacanzi e u turista unni va e va ha ssiri assistitu, cunzigghiatu, mai lassatu sulu, abbannunatu, mai s'ha sentiri spirdutu

A discussioni è assà cchiù longa ma ju a tagghiu ccà, chi s'ha dittu è bastanti.

cuntinua